Kongo Ebola indetiniń taralýyn boljaý úshin mobıldi baılanys derekterin paıdalana bastady
ASTANA. KAZINFORM – Kongo Demokratııalyq Respýblıkasynda Ebola indetiniń taralýy múmkin jańa aımaqtardy boljaý úshin alǵash ret mobıldi baılanystyń ıesizdendirilgen derekteri paıdalanylyp jatyr, dep habarlaıdy Reuters.
Taldaýdy shvedtiń kommertsııalyq emes Flowminder uıymy júrgizedi. Mamandar uıaly telefondardyń bazalyq stantsııalarǵa qosylýy týraly jınaqtalǵan derekter negizinde halyqtyń qozǵalysyn zertteıdi.
Derekterdi eldegi iri uıaly baılanys operatory Vodacom tegin usynady. Aqparatta abonentterdiń jeke basyn anyqtaýǵa múmkindik beretin málimetter joq.
Maýsym aıynda jarııalanǵan alǵashqy taldaý Itýrı provıntsııasyndaǵy Býnıa, Mýngvalý jáne Rvampara aýdandaryn qamtydy. Іndet osy aýmaqtarda bastalǵan bolýy múmkin degen boljam bar. Zertteýshiler atalǵan aýdandardan turǵyndardyń qaı baǵyttarǵa kóbirek qatynaǵanyn baqylaǵan.
Maýsym aıynyń sońyna qaraı adam aǵyny eń joǵary bolǵan on baǵyttyń barlyǵynda Ebola jaǵdaılary tirkeldi.
– Mamandar Kongo ózeniniń boıyndaǵy iri kólik toraby Kısanganıge erekshe nazar aýdardy. Mobıldi baılanys derekteriniń taldaýy alǵashqy jaǵdaılar anyqtalmaı turyp-aq bul qalaǵa vırýstyń taralý qaýpi joǵary ekenin kórsetti. Osydan keıin Kısanganıde epıdemııaǵa qarsy sharalar kúsheıtildi, – delingen habarlamada.
Zertteý Kısanganıdiń Kınshasa jáne Kongo ózeni boıyndaǵy basqa eldi mekendermen tyǵyz baılanysyn da kórsetti. Kısanganımen baılanysy eń joǵary 50 aýmaqtyń 15-i Kınshasa provıntsııasynda ornalasqan.
Maýsym aıynyń sońynda Dúnıejúzilik densaýlyq saqtaý uıymy qyrkúıek aıynyń sońyna deıin el astanasynda Ebola jaǵdaıynyń anyqtalý yqtımaldyǵyn 70% dep baǵalady.
Kongo Demokratııalyq Respýblıkasy úkimetiniń málimetinshe, 15 mamyrda indet jarııalanǵannan beri Ebolany 6250-den astam adam juqtyryp, 3039-dan astam adam qaıtys boldy.
DDSU qazirgi indetti tarıhtaǵy eń jyldam taralyp jatqan Ebola órshýi dep baǵalap otyr.
Buǵan deıin Kongoda Ebolaǵa qarsy vaktsınatsııa bastalǵany habarlanǵan. DDSU da Kongo Demokratııalyq Respýblıkasyndaǵy jaǵdaıǵa baılanysty indettiń odan ári taralý qaýpi bar ekenin eskertken edi.
Aıta keteıik, DDU Kongodaǵy Ebola indetiniń kórshi elderge taralý qaýpi týraly eskertti.
