Kongo DR-daǵy Ebola indeti: juqtyrǵandar sany 1 myńnan asty
ASTANA. KAZINFORM – Kongo Demokratııalyq Respýblıkasynda Ebola vırýsyn juqtyrýdyń rastalǵan jaǵdaılarynyń sany 1 000 adamnan asty. Bir aıdan astam ýaqytqa sozylǵan indet eldiń shyǵysyndaǵy qonys aýdarǵandarǵa arnalǵan úshinshi lagerge de tarady, dep habarlaıdy Reuters.
Úkimettiń málimetine súıensek, keminde 254 adam kóz jumǵan.
Resmı derekterge sáıkes, Hýngbe lagerinde 18 aılyq bala qaıtys boldy. Onyń bir apta boıy dene qyzýy joǵary bolǵan.
Balany aldymen eki medıtsınalyq ortalyqqa jetkizip, antıbıotıkter taǵaıyndaǵan. Alaıda Ebolaǵa arnalǵan test keıinirek júrgizilip, onyń oń nátıjesi bala qaıtys bolǵannan keıin ǵana belgili boldy.
Bılik ókilderiniń habarlaýynsha, balamen keminde 107 adam baılanysta bolǵan. Olardyń qatarynda týystary, medıtsına qyzmetkerleri jáne qonys aýdarǵandarǵa arnalǵan basqa lagerlerdiń turǵyndary bar.
Nızı óńiriniń densaýlyq saqtaý júıesiniń ókili, doktor Emmanýel Mýsıngýzı Býlemý juqtyrǵan naýqastardy oqshaýlaýǵa arnalǵan ınfraqurylymnyń qatty jetispeıtinin málimdedi.
– Biz bul naýqastardy halyqtan oqshaýlaýymyz kerek, óıtkeni olar basqa adamdarǵa juqtyrý qaýpin tóndiredi. Biraq olardy qaıda ornalastyramyz? – dedi ol.
Jergilikti bıliktiń málimetinshe, Býnııa qalasyndaǵy qonys aýdarǵandarǵa arnalǵan taǵy bir lagerde keminde 30 adam qaıtys bolǵan.
Buǵan deıin Kongo Demokratııalyq Respýblıkasynyń úsh provıntsııasynda zerthanalyq jolmen rastalǵan Ebola bezgegin juqtyrǵan naýqastar sany 896-ǵa jetkeni, onyń 232-siniń kóz jumǵany habarlanǵan.
Sondaı-aq Dúnıejúzilik densaýlyq saqtaý uıymy Kongo Demokratııalyq Respýblıkasyndaǵy Ebola indetine baılanysty jaǵdaıdy daǵdarystyq dep baǵalap, juqtyrǵandar sanynyń artýyn, qarjylandyrýdyń jetkiliksizdigin jáne shuǵyl sharalar qabyldaý qajettigin atap ótken edi.
