Kongo DR-daǵy Ebola indeti vırýstyń jańa shtamymen baılanysty bolýy múmkin – DDU
ASTANA. KAZINFORM – Kongo Demokratııalyq Respýblıkasy aýmaǵynda Ebola bezgeginiń jańadan órshýi jalǵasyp jatyr. Eldiń Densaýlyq saqtaý mınıstrliginiń málimetinshe, kóz jumǵandar sany 80 adamǵa jetti.
Dúnıejúzilik densaýlyq saqtaý uıymy óńirge shuǵyl áreket etý mıssııasyn jiberdi. Mamandar jergilikti bılikke tergeý júrgizýge, vırýs juqtyrǵandarmen baılanysta bolǵan adamdardy anyqtaýǵa jáne medıtsınalyq mekemelerdegi ınfektsııalyq baqylaý sharalaryn kúsheıtýge kómektesip jatyr.
Aýrý oshaǵy eldiń soltústik-shyǵysyndaǵy Itýrı provıntsııasynda anyqtaldy. Juqtyrý jaǵdaılarynyń biri Býnııa qalasyndaǵy Evangelııalyq medıtsınalyq ortalyqta tirkelgen. Onda Ebolaǵa tán joǵary temperatýra, qan ketý, qusý jáne qatty álsizdik belgileri baıqalǵan medbıke qaıtys boldy.
Kongo Demokratııalyq Respýblıkasy úkimeti jedel shtab qurylǵanyn jáne epıdemıologııalyq baqylaý kúsheıtilgenin málimdedi. Afrıkanyń aýrýlardy baqylaý jáne aldyn alý ortalyqtary Kongo Demokratııalyq Respýblıkasy, Ýganda, Ońtústik Sýdan jáne halyqaralyq seriktester ókilderiniń qatysýymen transshekaralyq monıtorıngti kúsheıtý máselesine arnalǵan shuǵyl keńes ótkizdi.
Aldyn ala zertteýler anyqtalǵan vırýs nusqasy buryn keń taralǵan «zaırlik» shtamnan ózgeshe bolýy múmkin ekenin kórsetip otyr. Qazirgi vaktsınalar men emdeý tásilderi dál osy shtamǵa qarsy ázirlengen.
Іndetpen kúresti qoldaý úshin Dúnıejúzilik densaýlyq saqtaý uıymy Býnııaǵa bes tonnaǵa jýyq gýmanıtarlyq jáne medıtsınalyq júk jetkizip jatyr. Onyń ishinde qorǵanys quraldary, zerthanalyq jabdyqtar, naýqastardy emdeýge arnalǵan materıaldar jáne aldyńǵy shepte jumys isteıtin dárigerlerge arnalǵan mobıldi shatyrlar bar.
Mohamed Djanabı uıym vırýstyń taralýyn toqtatyp, qurbandar sanynyń artýyna jol bermeý úshin qosymsha resýrstar men sarapshylardy jedel jumyldyryp jatqanyn aıtty.
Qazirgi indet – Ebola vırýsy 1976 jyly anyqtalǵannan beri Kongo Demokratııalyq Respýblıkasy tarıhynda 17-márte órship otyr. Jaǵdaıdy Itýrıdegi gýmanıtarlyq daǵdarys, qarýly zorlyq-zombylyq jáne etnosaralyq qaqtyǵystar kúrdelendirip otyr.
Eske sala ketsek, bir kún buryn Kongoda Ebola indeti qaıta tarap, 65 adam kóz jumyp, kórshi elderge qaýip tóne bastaǵanyn jazdyq.
