Kongo DR-daǵy Ebola el tarıhyndaǵy eń iri indetke aınaldy – DDU
ASTANA. KAZINFORM – Dúnıejúzilik densaýlyq saqtaý uıymy (DDU) qazirgi Ebola indeti Kongo Demokratııalyq Respýblıkasy tarıhyndaǵy eń iri indetke aınalǵanyn málimdedi. Elde aýrý juqtyrýdyń 3,6 myńnan astam jaǵdaıy rastaldy, dep habarlaıdy TASS.
Bul týraly DDU-nyń resmı saıtynda jarııalanǵan málimdemede aıtylǵan.
– Qazirgi ýaqytta bul Kongo Demokratııalyq Respýblıkasynda buryn-sońdy tirkelgen Ebola indetiniń eń iri oshaǵy bolyp otyr. 2026 jylǵy 30 shildedegi jaǵdaı boıynsha 3 605 rastalǵan jaǵdaı tirkeldi. Onyń ishinde 1 587 adam qaıtys boldy, bul ólim-jitim deńgeıiniń 44 paıyz ekenin kórsetedi, – delingen habarlamada.
Qujatqa sáıkes, sońǵy tolyq esepti epıdemıologııalyq aptada aýrý juqtyrýdyń eń joǵary aptalyq kórsetkishi – 567 jaǵdaı jáne qaıtys bolǵandardyń eń joǵary sany – 296 adam tirkelgen. DDU muny ınfektsııanyń erekshe jyldam taralyp jatqanyn kórsetetin belgi dep baǵalap, indettiń kúsheıip kele jatqanyn atap ótti.
Ebola indetiniń 17-oshaǵy bıyl 15 mamyrda Kongo Demokratııalyq Respýblıkasynyń shyǵysynda jáne Ýgandada bastaldy. Aýrý Kongonyń úsh provıntsııasyn qamtydy.
Eske salsaq, buǵan deıin Frantsııada Ebola vırýsyn juqtyrýdyń alǵashqy jaǵdaıy tirkelgen bolatyn. Sondaı-aq Kongo Demokratııalyq Respýblıkasynda Ebola indetinen kóz jumǵandar sany 1 521 adamǵa jetkeni habarlanǵan edi.
Buǵan deıin DDU Ebola indetimen kúresý úshin 518 mln dollarlyq baǵdarlamany iske qosqanyn jazǵanbyz.
