Kongo DR-da Ebola juqtyrǵandar sany taǵy da artty
ASTANA. KAZINFORM – Kongo Demokratııalyq Respýblıkasynda Ebola bezgegin juqtyrǵan zerthanalyq rastalǵan jaǵdaılar sany 5515-ke jetti. Sońǵy táýlikte taǵy 51 adamnan vırýs anyqtaldy, dep habarlaıdy TASS.
Bul týraly eldiń Densaýlyq saqtaý mınıstrligi málimdedi.
Іndetten 2642 adam qaıtys bolǵan. Ólim-jitim deńgeıi 47,9%-dy quraıdy.
Qazir aýrýhanalar men medıtsınalyq oqshaýlaý oryndarynda Ebola juqtyrdy degen kúdikpen 700-den astam adam jatyr. Naýqastarmen baılanysta bolǵan adamdardy anyqtaý jáne baqylaý deńgeıi 85,5%-dy qurady.
15 mamyrda Kongo DR men Ýgandada bastalǵan indet Afrıkadaǵy Ebola tarıhyndaǵy adam ólimi boıynsha ekinshi eń iri epıdemııaǵa aınaldy.
Qazir vırýs Kongo DR-dyń alty provıntsııasynda tirkelgen. Іndettiń epıtsentri Itýrı provıntsııasynda ornalasqan. Al Ýganda bıligi 28 shildede eldegi Ebola indetiniń aıaqtalǵanyn jarııalady.
Dúnıejúzilik densaýlyq saqtaý uıymy Kongo DR-daǵy Ebola indetine halyqaralyq mańyzy bar qoǵamdyq densaýlyq saqtaý salasyndaǵy tótenshe jaǵdaı mártebesin berdi.
Eske sala ketsek, buǵan deıin Kongo DR-da Ebola indetinen qaza tapqandar sany 2500-den asqanyn jazdyq.
Sondaı-aq atalǵan elge Ebolaǵa qarsy vaktsınanyń alǵashqy partııasynyń jetkizilgeni habarlandy.
