Kongo DR-da Ebola vırýsynan 5,5 myńnan astam adam qaıtys boldy
ASTANA. KAZINFORM – Kongo Demokratııalyq Respýblıkasynda Ebola bezgeginen kóz jumǵandar sany 5,5 myńnan asty. Aýrý órshigeni jarııalanǵannan keıin jarty jyl ótse de, indetti baqylaýǵa alý múmkin bolmaı otyr, dep habarlaıdy Reuters agenttigi.
Bul týraly Afrıka aýrýlardy baqylaý jáne aldyn alý ortalyǵynyń (Africa CDC) bas dırektory Jan Kaseıa málimdedi.
– Búginde bul indettiń áli de úlken qaýip tóndirip otyrǵanymen jáne baqylaýǵa alynbaǵanymen bárimiz kelisemiz, – dedi ol Reuters agenttigine bergen suhbatynda.
Resmı málimet boıynsha, 15 mamyrda indet jarııalanǵannan beri elde 11,2 myńnan astam adam juqtyryp, 5,5 myńnan astam adam qaıtys bolǵan.
Kaseıanyń aıtýynsha, aýrýdy jańadan juqtyrǵandardyń 80 paıyzdan astamy baılanysta bolǵan adamdar tizimine engizilmegen. Sonymen qatar ólim-jitimniń 65 paıyzdan astamy medıtsınalyq mekemelerden tys jerde tirkelip otyr.
– Eger biz bul indetti qazir toqtatpasaq, ol álemdegi eń aýqymdy Ebola epıdemııasyna aınalady, – dep eskertti Africa CDC basshysy.
Qazirgi indetke vırýstyń sırek kezdesetin Býndıbýgıo túri sebep bolǵan. Bul – baqylaý tarıhyndaǵy kólemi jaǵynan ekinshi iri órshý. Eń aýqymdy Ebola epıdemııasy 2014–2016 jyldary Batys Afrıkada bolǵan. Sol kezde 28,6 myńnan astam adam juqtyryp, 11 myńnan astamy qaıtys boldy.
«Shekarasyz dárigerler» uıymynyń habarlaýynsha, halyqaralyq kómek kórsetiletinine ýáde berilgenimen, indetten eń kóp zardap shekken aýdandarda resýrstar áli de jetkiliksiz. Negizgi problemalar qatarynda medıtsına qyzmetkerleriniń tıisti daıarlyǵynyń bolmaýy, jedel járdem kólikterine janarmaıdyń jetispeýi jáne epıdemıologııalyq baqylaý toptarynyń joqtyǵy bar.
Kaseıanyń sózinshe, Kongo úkimeti men halyqaralyq donorlar arasyndaǵy úılestirý jumystary da qıyndyq týdyryp otyr. Kómek retinde jalpy somasy shamamen 2,9 mlrd dollar bólýge ýáde berilgen.
– Biz eshkimdi aıyptap otyrǵan joqpyz. Bul – bárimizdiń ortaq sátsizdigimiz, – dep atap ótti ol.
Africa CDC basshysy donorlardy ýáde etilgen qarajattyń shamamen 1,6 mlrd dollaryn bólýdi jáne shyǵyndardyń qaıtalanýyna jol bermeý úshin Kongo bıligimen ózara is-qımyldy jolǵa qoıýdy shaqyrdy.
Ol sondaı-aq keıbir medıtsına qyzmetkerleriniń birneshe aı boıy jalaqy almaǵanyn moıyndady. Qazir el bıligi tólemderdi esepteý júıesin tsıfrlandyrý jumystaryn júrgizip jatyr.
Eske sala ketsek, buǵan deıin Kongoda Ebola vırýsyn juqtyrǵandar sany 11 myńnan asqanyn jazdyq.