Kongo DR-da ashýly top Ebola shatyr-aýrýhanalaryn órtep jiberdi
ASTANA. KAZINFORM – Kongo Demokratııalyq Respýblıkasynyń shyǵysyndaǵy Ebola indetiniń oshaǵyna aınalǵan aýrýhananyń bir bóligine ashýly top shabýyl jasap, oqshaýlaý shatyrlaryn órtep jiberdi, dep habarlaıdy VVS agenttigi.
Oqıǵa vırýs juqtyrdy dep kúdikke ilingen jas jigittiń týystary men dostaryna onyń máıitin jerleý úshin alyp ketýge ruqsat berilmegennen keıin bolǵan.
– Olar alǵashynda aýrýhanaǵa tas laqtyra bastady. Tipti artynsha oqshaýlaý palatalary retinde paıdalanylǵan shatyrlardy órtep jiberdi, – dedi Rýampara jalpy aýrýhanasynda bolǵan jaǵdaıdy kórgen jergilikti saıasatker Lıýk Malembe Malembe.
Tártipsizdik kezinde polıtsııa jınalǵandardy taratý úshin aspanǵa eskertý retinde oq atqan.
Eboladan qaıtys bolǵan adamnyń máıiti asa qaýipti ınfektsııa kózi sanalady. Sondyqtan indettiń taralýyn boldyrmaý úshin bılik qaýipsiz jerleý rásimderin qatań baqylaıdy.
Itýrı provıntsııasyndaǵy Býnııa qalasynyń mańynda ornalasqan Rýampara aýrýhanasynyń medıtsına qyzmetkerleri áskerı kúzetke alynǵan. Óıtkeni aımaqta tirkelgen jaǵdaılardyń basym bóligi osy óńirde anyqtalǵan.
AFP agenttiginiń málimetinshe, narazylyq kezinde tas laqtyrǵandardyń kesirinen bir medıtsına qyzmetkeri jaraqat alǵan.
Ebolaǵa qarsy qaýipsizdik sharalaryn úılestirip júrgen Jan-Klod Mýkendıdiń aıtýynsha, qaıtys bolǵan jigit jergilikti qaýymdastyq arasynda tanymal bolǵan.
– Onyń ólimine ashýlanǵan adamdar bul aýrýdyń qanshalyqty qaýipti ekenin tolyq túsinbeıdi, – dedi ol.
Reuters agenttiginiń jazýynsha, kóz jumǵan jas jigit birneshe jergilikti komandada oınaǵan fýtbolshy bolǵan eken. Al anasy uly Eboladan emes, ish súzeginen qaıtys boldy dep esepteıdi.
Malembeniń aıtýynsha, kópshilik Kongo Demokratııalyq Respýblıkasynyń shyǵysynda 130-dan astam adamnyń ómirin qıǵan vırýstyń bar ekenine áli de senbeıdi.
– Adamdarǵa ne bolyp jatqany jóninde jetkilikti túsindirý jumystary júrgizilmegen. Ásirese shalǵaı aýdandardaǵy keıbir turǵyndar Ebolany syrttan kelgenderdiń oılap tapqan dúnıesi dep sanaıdy, – dedi saıasatker.
Onyń sózinshe, keıbir turǵyndar úkimettik emes uıymdar men aýrýhanalar aqsha tabý úshin indetti qoldan jasap otyr dep oılaıdy.
Tártipsizdik saldarynan jerleýge daıyndalǵan máıitpen birge eki shatyr órtenip ketken.
Dúnıejúzilik densaýlyq saqtaý uıymy Eboladan qaıtys bolǵandardy «qaýipsiz ári laıyqty túrde jerleýdi» usynady. Mundaı rásimder arnaıy qorǵanysh kıimindegi mamandardyń qatysýymen júrgiziledi.
Órtelgen shatyrlarda alty naýqas em qabyldap jatqan. Alǵashynda olar tártipsizdik kezinde qashyp ketken bolýy múmkin degen aqparat taraǵan. Alaıda shatyrlardy basqarǵan Alima medıtsınalyq gýmanıtarlyq uıymynyń málimetinshe, barlyq naýqas tabylyp, qazir aýrýhanada em alyp jatyr.
