Kongo DR-da kóterilisshiler 50 turǵyndy urlap ketti
ASTANA. KAZINFORM – Kongo Demokratııalyq Respýblıkasynyń (KDR) shyǵysyndaǵy Itýrı provıntsııasynda «Demokratııalyq alıans kúshteri» (ADF) kóterilisshiler tobynyń shabýylynan 5 beıbit turǵyn qaza taýyp, taǵy 50 adam urlandy, dep habarlaıdy Anadolý agenttigi.
Ulttyq BAQ málimetinshe, ADF sodyrlary Itýrı provıntsııasynyń Mambasa aýdanyndaǵy Babıla-Babombı aýyldyq aımaǵynda beıbit turǵyndarǵa qarýly shabýyl jasaǵan.
Babıla-Babombıge jaqyn Kaýbelı ózeni mańyndaǵy shabýyldan 5 beıbit turǵyn qaza tapty. Al Kılıbo aýylyndaǵy aýyl sharýashylyǵy alqaptarynda júrgen 50 fermerdi ADF sodyrlary urlap ketken.
Qazir óńirde urlanǵan turǵyndardy izdeý jáne shabýyl jasaǵandardy zalalsyzdandyrý maqsatynda izdestirý jáne qaýipsizdikti qamtamasyz etý operatsııalary jalǵasyp jatyr.
KDR bıligi bul shabýylǵa qatysty ázirge resmı málimdeme jasaǵan joq.
23-25 shilde aralyǵynda Mambasa aýdanynda ADF músheleri jasaǵan eki shabýyldan keminde 32 beıbit turǵyn qaza taýyp, kóptegen adam urlanǵan.
Top músheleri adamdardy aqsha talap etý maqsatynda jıi urlap áketedi.
ADF óz qyzmetin Ýganda men KDR aýmaǵynda 1990 jyldardyń sońynda bastaǵan. Uıym Ýgandanyń Ulttyq azat etý armııasynyń (NALU) burynǵy músheleri, Ýgandanyń Musylman azat etý armııasy jáne «Ýaǵyz qaýymy» sekildi qozǵalystardyń birigýi nátıjesinde qurylǵan.
2014 jyldan beri ADF shabýyldarynan myńdaǵan beıbit turǵyn qaza taýyp, júzdegen myń adam úıin tastap ketýge májbúr boldy.
Aıta keteıik, buǵan deıin DDU Kongo DR-daǵy Ebola el tarıhyndaǵy eń iri indetke aınalǵanyn málimdegen-di.
