Kongo Demokratııalyq Respýblıkasynda qaıyq apatynan 86 adam qaza tapty

ASTANA. KAZINFORM — Kongo Demokratııalyq Respýblıkasynyń batysyndaǵy Ekvatorıal provıntsııasynda jolaýshylar kateriniń apatqa ushyraýy saldarynan aldyn ala málimetter boıynsha 86 adam opat boldy, dep habarlaıdy Anadoly.

Jergilikti BAQ-tyń habarlaýynsha, Barınga ózeni boıymen Basankýs aýdanynda júrip kele jatqan motorly qaıyq belgisiz sebeptermen aýdarylǵan. Jaqyn mańdaǵy aýyl turǵyndarynyń kómegimen segiz adam qutqarylyp, aman qaldy.

Qaıǵyly oqıǵanyń sebebi retinde qaıyqtyń artyq júktelýi men túngi ýaqytta júrýi qarastyrylyp otyr.

Іzdestirý-qutqarý jumystary jalǵasyp jatyr. Sol ýaqytta qaıyqta bolǵan adam sany naqty anyqtalmaǵan.

Tropıktik klımattaǵy, ormandarǵa, ózenderge jáne kólderge baı elde iri qalalardan tys jerde transport júıesi álsiz damyǵan. Sondyqtan kópshilik turǵyndar sýdy tasymaldaý joldaryn jıi qoldanady. Alaıda eskirgen, artyq júktelgen kemelerdi jıi paıdalaný qaıǵyly oqıǵalarǵa ákelip otyr.

Budan buryn habarlanǵandaı, sáýir aıynda Kongo Respýblıkasynyń Ekvator provıntsııasynda Kongo ózeninde qaıyq aýdarylyp, 50 adam kóz jumdy.