Kongoǵa Ebola indetine qarsy vaktsınanyń alǵashqy partııasy jetkizildi
ASTANA. KAZINFORM — Kongo Demokratııalyq Respýblıkasyna Ebola bezgegine qarsy Ervebo vaktsınasynyń 16,2 myń dozadan turatyn alǵashqy partııasy jetkizildi. Bul týraly eldiń Densaýlyq saqtaý mınıstrligi málimdedi, dep habarlaıdy TASS.
Vedomstvonyń málimetinshe, vaktsına Kongo astanasy Kınshasadaǵy halyqaralyq áýejaıǵa jetkizilgen.
Buǵan deıin Dúnıejúzilik densaýlyq saqtaý uıymy (DDSU) Kongo Demokratııalyq Respýblıkasyna Ervebo vaktsınasynyń 70 myń dozasyn jiberetinin habarlaǵan. Bul vaktsına adamdarda Ebola bezgegin týdyratyn Zaır vırýsyna qarsy tıimdiligin kórsetken. Alaıda qazirgi indetke sebep bolǵan Býndıbýdjıo vırýsyna qarsy onyń tıimdiligi ázirge belgisiz. Qazir álem ǵalymdary Býndıbýdjıo vırýsyna qarsy alǵashqy vaktsınany ázirleý jumystaryn aıaqtap jatyr.
Ervebo (rVSV-ZEBOV) vaktsınasy Kongo Demokratııalyq Respýblıkasynda Zaır vırýsynan týyndaıtyn Ebolaǵa qarsy 2018 jyldan beri qoldanylyp keledi. Ony kanadalyq ǵalymdar ázirlegen, al vaktsına óndirisin Merck kompanııasy júzege asyrady.
Aldaǵy birneshe aptada Ervebo vaktsınasynyń 20 myń dozasy Kongo Demokratııalyq Respýblıkasynda klınıkalyq synaqtar ótkizýge jumsalady. Qalǵan 50 myń doza Ebola indeti taralǵan aımaqtaǵy eń osal áleýmettik toptardy vaktsınatsııalaýǵa baǵyttalady. Mamandar vaktsınanyń aǵzanyń qorǵanys qabiletin kúsheıtýge yqpal etedi dep úmittenip otyr.
Kongo Densaýlyq saqtaý mınıstrliginiń qazirgi derekterine sáıkes, eldegi Ebola indeti bastalǵaly 5 375 adam aýrý juqtyrǵan, 2 557 adam qaıtys bolǵan. Ólim-jitim kórsetkishi 47,6 paıyzǵa jetti. Qazir aýrýhanalar men medıtsınalyq oqshaýlaý ortalyqtarynda Ebola dıagnozy qoıylǵan 737 adam emdelip jatyr.
15 mamyrda Kongo Demokratııalyq Respýblıkasy men Ýgandada bastalǵan indet Afrıkada osy aýrý boıynsha baqylaý júrgizile bastaǵaly bergi ólim-jitimi jóninen ekinshi iri indetke aınaldy. Qazirgi ýaqytta Ebola Kongonyń alty provıntsııasynda tirkelgen. Іndettiń negizgi oshaǵy Itýrı provıntsııasynda ornalasqan.
Ýganda bıligi 28 shildede eldegi Ebola indetiniń aıaqtalǵanyn málimdedi. Al DDSU Kongo Demokratııalyq Respýblıkasyndaǵy Ebola indetine halyqaralyq mańyzy bar densaýlyq saqtaý salasyndaǵy tótenshe jaǵdaı mártebesin berdi.
Aıta keteıik, Kongoda Ebola indetinen qaza tapqandar sany 2500-den asty.
