Kongo azamaty Monıka Kamganza «bosqyn» mártebesin surap otyr - ІІM
NUR-SULTAN. QazAqparat - Kóshi-qon qyzmeti komıteti tóraǵasynyń orynbasary Arman Sadanov kongolyq Monıka Kamganzanyń mártebesi týraly pikir bildirdi, dep habarlaıdy QazAqparat tilshisi.
Arman Sadanovtyń aıtýynsha, kongolyq azamatsha Qazaqstan tarapynan «bosqyn» mártebesin berýdi surap otyr. Al Qazaqstan tarapy ony elden shyǵarýǵa árekettenip jatqan joq.
«Ol azamatshanyń qazir naqty bir statýsy joq. Tipti eńbek mıgrantyna da jatqyzýǵa kelmeıdi. Ózi bizden «bosqyn» mártebesin surap otyr. Qydyryp kelip, qalyp qoıǵan adamdy qalaısha «bosqyn» dep ataýǵa bolady? Ony elden shyǵaryp jibereıik dep jatqan eshkim joq. Kerisinshe, qujattaryn retteýge kómektesýge daıynbyz. Óıtkeni, ol qazir eshqandaı qujatsyz turyp jatyr. Kongo eliniń bizdiń elde konsýldyq mekemesi joq. Sondyqtan Máskeýge baryp, tıisti anyqtama ákelýi kerek», - deıdi Arman Sadanov.
Komıtet ókili Monıka Kamganzanyń Qazaqstan aýmaǵynan bir ret shyqsa, qaıta kire almaı qalamyn dep qorqyp otyrǵanyn aıtady.
«Onyń máselesimen qoǵamdyq uıym aınalysyp júr. Olarǵa da zańdy jolyn kórsetkenbiz. Biraq kongolyq azamatsha Máskeýge barsa, qaıtadan bul jaqqa kire almaı qalýym múmkin dep qaýiptenedi. Sol úshin ár joly ár túrli sebep-saldar aıtyp, ýaqyt sozýda», - deıdi ol.
Kóshi-qon komıtetiniń ókili Monıka Kamganzanyń EKSPO kórmesinen keıin osyndaı jaǵdaıǵa tap bolǵan jalǵyz sheteldik ekenin de aıtty.
Eske salsaq, buǵan deıin kongolyq Monıka Kamganzanyń týǵan jerine orala almaı júrgeni týraly aqparat taraǵan bolatyn.
