Konfessııaaralyq dıalog jahandyq terrorızmmen kúresýge múmkindik beredi - sarapshy

NUR-SULTAN. QazAqparat – Qoǵamda berik ornaǵan konfessııaaralyq dıalog jahandyq terrorızmmen kúresýge múmkindik beredi. Mundaı pikirdi Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń bas sarapshysy Lázzat Qalybekova bildirdi, dep habarlaıdy QazAqparat tilshisi.

«Álem elderi turaqty damýǵa qol jetkizý úshin konfessııaaralyq, mádenıetaralyq kelisimdi saqtaýǵa asa joǵary mán beredi. Qoǵamda berik ornaǵan konfessııaaralyq dıalog ekstremızm men terrorızm, ksenofobııa, rýhanı saýatsyzdyq pen ústemdik etýge talpynýshy kúshtermen kúresýge jáne olardy boldyrmaýǵa septigin tıgize alady. Bul baǵytta elimizde atqarylǵan jumystar aýqymdy. Atap aıtsaq, 2000-jyldardyń basynda konfessııalar men halyqtardy jaqyndastyrý týraly jıyn, 2002 jyly maýsym aıynda Almatyda AÓSShK-niń birinshi sammıti, 2003 jyly aqpan aıynda Halyqaralyq beıbitshilik jáne kelisim konferentsııasy, 2011 jyldyń qyrkúıeginde Rım Papasy Ioann Pavel II-niń elimizge jasaǵan tarıhı sapary. Bul úderister men oqıǵalar álemdik jáne dástúrli dinder lıderleriniń sezin shaqyrý týraly aýqymdy bastamanyń júzege asýyna zor yqpal etti», - dedi Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń bas sarapshysy Lázzat Qalybekova.

Sondaı-aq, sarapshy Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń atqaryp jatqan jumystaryna toqtaldy. Lázzat Ǵabıtqyzynyń aıtýynsha, ortalyqtyń qyzmeti elimizdegi dinı saýattylyqty kóterýge, ózge din ókilderimen yntymaqtastyqty arttyrýǵa baǵyttalǵan. Sonymen qatar ortalyq shet eldik uıymdarmen birlese jumys isteıdi. Bir jyl aralyǵynda BUU Órkenıetter Alıansymen, Halyqaralyq mádenı dıplomatııa ınstıtýtymen jáne Islamabad Halyqaralyq ıslam ýnıversıtetimen seriktestik ornatqan. Nátıjesinde Qazaqstan kótergen ıgi bastamalar álemde joǵary mańyzǵa ıe bolyp, dinaralyq qaýymdastyqtar tarapynan qoldaý taýyp keledi.

Avtor: Álıhan Asqaruly