Konferentsııa lıgasy: «Tobyl» syrt alańda «Panevejıspen» teń tústi
ASTANA. KAZINFORM - Búgin qazaqstandyq «Tobyl» (Qostanaı) fýtboldan UEFA Konferentsııa lıgasynyń ekinshi irikteý kezeńinde Lıtvanyń «Panevejıs» klýbymen alǵashqy oıynyn ótkizdi.
Kezdesý barysynda qazaqstandyq komandanyń belsendiligi baıqalyp turdy. Soǵan qaramastan alǵashqy goldy lıtvalyq klýb soǵyp ketti. Olardyń qatarynan qorǵaýshy Seıdına Keıta 45-mınýtta mergendik tanytty.
Oıynnyń ekinshi kezeńinde 60-mınýtta «Panevejıs» qaqpasyna penaltı belgilengen edi. Ony oryndaý barysynda qostanaılyq klýbtyń kapıtany Ashat Taǵybergen múlt ketti.
Al 84-mınýtta «Tobyl» sapynan Nemanıa Tsavnıch baspen gol soǵyp, tarazy basyn teńestirdi.
Osylaısha komandalar 1:1 esebine qanaǵat bildirip tarasty.
Qarymta kezdesý 30 shildede Qostanaı qalasynda bolady.
Qazaqstandyq klýb úshinshi irikteý kezeńine shyqqan jaǵdaıda «Partızan» (Serbııa) - «ÝNA Shtrassen» (Lıýksembýrg) jubynyń jeńimpazymen oınaıdy. Birinshi kezdesý 6 tamyzda syrt alańda ótse, qarymta oıyn 13 tamyzǵa belgilengen.
«Panevejıs» komandasy 2015 jyly qurylǵan. 2019 jyldan beri óz elinde joǵary A lıgasynda oıyn kórsetip keledi. 2023 jyly alǵash ret el chempıony ataǵyn jeńip aldy. Byltyr olar el kýbogynda jeńimpaz tuǵyrynan kórindi.
