Konferentsııa lıgasy: «Tobyl» «Sankt-Gallen» komandasynan oısyraı jeńildi

ASTANA. KAZINFORM – Búgin fýtboldan UEFA Konferentsııa lıgasynyń ekinshi irikteý kezeńinde qazaqstandyq «Tobyl» syrt alańda Shveıtsarııanyń «Sankt-Gallen» komandasymen kezdesti.

Eýrokýbok oıyndarynda synǵa túsip jatqan qazaqstandyq komandalar arasynda «Tobylǵa» qolaısyz qarsylas tústi. 1879 jyly qurylǵan komanda qazirge deıin óz elinde 1903/04, 1999/2000 jyldardaǵy maýsymda eki márte chempıondyq ataqty jeńip alǵan. Dese de komanda fýtbol damyǵan memlekette oınaıdy. Sondyqtan olardyń tájirıbesi mol ekeni belgili.

Alǵashqy mınýttan shveıtsarııalyq komanda tizgindi qolǵa alýǵa tyrysty. Oǵan qarsy qostanaılyq komanda fýtbolshylary saýatty oınaı bildi. Esesine olar qarymta shabýyldar uıymdastyryp, gol soǵatyn múmkindikti izdedi. Oıynnyń 28-mınýtynda qostanaılyq Igor Ivanovıchtiń qaqpaǵa baǵyttaǵan doby «Sankt-Gallen» fýtbolshysy Albert Valchıdiń aıaǵyna tıip, baǵyty ózgergen dop qaqpa torynda týlap jatty. Shveıtsarııalyq fýtbolshy avtogoldyń avtory atandy.

Óz qaqpasyna gol jiberip alǵannan keıin «Sankt-Gallen» basymdyqty arttyra tústi. Nátıjesinde olardyń qatarynan Mıhaılo Stevanovıch 35, Shadrak Akolo 39-mınýtta eki gol soǵyp ketti.

Shveıtsarııalyq komandadan Basten Toma 77, Albert Valchı 97-mınýtta mergendik tanytty.

Osylaısha «Tobyl» qarsylasynan 1:4 esebimen jeńilip qaldy. Endi qarymta oıyn 1 tamyzda Qostanaı qalasynda ótedi.

Aıta ketsek, budan buryn Konferentsııa lıgasy ekinshi irikteý kezeńinde «Astana» «Mılsamımen» teń tústi.

Eske salsaq, Konferentsııa lıgasynda 24 shildede «Ordabasy» «Dıfferdanj-03» komandasyna ese jiberdi.