Konferentsııa lıgasy: «Elimaı» penaltıden «Alashkertke» ese jiberdi
ASTANA. KAZINFORM - Búgin, 16 shilde kúni UEFA Konferentsııa lıgasy birinshi irikteý kezeńinde qazaqstandyq «Elimaı» (Semeı) Armenııanyń «Alashkert» komandasymen qarymta oıyn ótkizdi.
Eki komanda arasyndaǵy alǵashqy kezdesýde 1:1 esebine qanaǵat bildirgen edi. Matchtyń 60-mınýtynda Arsen Áshirbek «Elimaıdy» alǵa shyǵarsa, 86-mınýtta Davıd Terterıan esepti teńestirdi.
Sondyqtan eki komanda úshin búgin jeńiske jetýdiń mańyzy erekshe boldy. Jeńimpaz komanda jarysty jalǵastyrýǵa múmkindik alatyn edi.
Kezdesý barysynda armenııalyq klýbtan Momo Týre 4-mınýtta esep ashqan edi. Oǵan semeılik komandadan Akmal Baktııarov 11-mınýtta bir golmen jaýap berdi.
Oıynnyń negizgi bóligi 1:1 esebimen teń aıaqtalyp, qosymsha kezeńge ulasty. Qosymsha kezeńde «Elimaı» sapynan Hrvoe Ilıch óz komandasyn alǵa shyǵarsa, armenııalyq klýbtan Daýda Togola 121-mınýtta qaıtadan tarazy basyn teńestirdi.
Osylaısha oıyn penaltı serııasyna ulasyp, bul joly «Alashkert» jarysty jalǵastyrýǵa múmkindik aldy.
Armenııanyń tórt dúrkin chempıony (2015/16, 2016/17, 2017/18, 2020/21) atanǵan «Alashkert» alǵash ret 1990 jyly qurylǵan edi. Sol jyldary komanda Gegarkýnık oblysy Martýnı qalasynyń atynan synǵa tústi. Arada on jyldaı ýaqyt ótkende bul ujym túrli sebepke baılanysty birinshilikke qatysýdan shet qaldy.
2011 jyldan beri «Alashkert» qaıta jańǵyryp, kóptegen jetistikke qol sozdy.
Sondaı-aq qostanaılyq klýb Konferentsııa lıgasyn ekinshi irikteý kezeńinen bastaıdy. Qarsylasy - Lıtvanyń «Panevejıs» klýby.
Aıta ketsek, budan buryn almatylyq «Qaırat» UEFA Chempıondar lıgasy birinshi irikteý kezeńinde Chernogorııanyń «Sýteska» klýbyn (2:1, 2:0) qapy qaldyrdy. Endi olar ekinshi irikteý kezeńinde Kıprdiń «Omonııa» klýbymen sheberlik baıqasady.
