Konferentsııa lıgasy: «Astana» jáne «Aqtóbeniń» aldaǵy qarsylastary anyqtaldy

ASTANA. KAZINFORM — Qazaqstandyq «Astana» jáne «Aqtóbe» klýbtarynyń UEFA Konferentsııa lıgasy úshinshi irikteý kezeńindegi qarsylastary anyqtaldy.

Elordalyq «Astana» Konferentsııa lıgasy ekinshi irikteý kezeńinde Moldovanyń «Zımbrý» komandasyn jeńgen jaǵdaıda úshinshi irikteý kezeńinde oǵan «Vardar» (Soltústik Makedonııa) jáne «Lozanna» (Shveıtsarııa) jubynyń jeńimpazy qarsylas atanady. Elordalyq komanda eýrokýboktaǵy alǵashqy oıynyn ekinshi irikteý kezeńinen bastap otyr.

Al «Aqtóbe» ekinshi irikteý kezeńinde Chehııanyń «Sparta» klýbyn qapy qaldyrǵan jaǵdaıda «Ararat» (Armenııa) — «Ýnıversıtatıa» Klýj (Rýmynııa) jubynyń jeńimpazymen kezdesedi. Jarystyń atalǵan satysyndaǵy oıyndar 7 jáne 14 shilde kúnderine belgilengen.

Aıta ketsek, budan buryn «Aqtóbe» Eýropa lıgasy birinshi irikteý kezeńinde Polshanyń «Legııa» klýbyna (0:1, 0:1) jol berdi. 

Sondaı-aq Almatylyq «Qaırat» komandasy Chempıondar lıgasy ekinshi irikteý kezeńinde 22 jáne 29 shilde kúnderi Fınlıandııanyń «KýPS» komandasyna ese jibergen jaǵdaıda Eýropa lıgasy úshinshi irikteý kezeńinde oınaýǵa múmkindik alady.

Bul joly olar atalǵan týrnırde RFSh (Latvııa) men «Malme» (Shvetsııa) jubynyń jeńilgen komandasymen kezdesedi. 

Eske salsaq, budan buryn almatylyq «Qaırat» komandasynyń UEFA Chempıondar lıgasy úshinshi irikteý kezeńindegi qarsylasy anyqtaldy.