Konferentsııa lıgasy: «Astana» jáne «Aqtóbe» jarysty jalǵastyra ala ma

ASTANA. KAZINFORM — UEFA Konferentsııa lıgasy ekinshi irikteý kezeńinde búgin qazaqstandyq «Astana» jáne «Aqtóbe» komandalary qarymta oıyndaryn ótkizedi.

Aldymen elordalyq «Astana» syrt alańda Moldovanyń «Zımbrý» komandasyn qabyldaıdy. Kezdesý qazaqstandyq ýaqytpen 21:50–de bastalyp, «Qazsport» telearnasynan tikeleı efırde kórsetiledi.

Birinshi kezdesýde komandalar 1:1 esebine qanaǵat bildirdi.

«Astana» Konferentsııa lıgasyndaǵy oıynyn birden ekinshi irikteý kezeńinen bastady.

«Zımbrý» 1947 jyly qurylǵan. Óz elinde segiz márte chempıon atandy. Sońǵy ret mundaı ataqqa 2000 jyly ıe boldy. Bıyl olar Moldova chempıonatynda qola júldeger atandy.

Sondaı-aq búgin «Aqtóbe» syrt alańda Chehııanyń «Sparta» (Praga) komandasymen sheberlik baıqasady.

Kezdesý qazaqstandyq ýaqytpen 22:50–de bastalyp, «Qazaqstan» telearnasynan tikeleı efırde kórsetiledi.

Alǵashqy oıynda «Aqtóbe» qarsylasynan 2:1 esebimen basym tústi.

«Aqtóbe» eýrokýbok oıyndaryn Eýropa lıgasy birinshi irikteý kezeńinen bastap, bul joly Polshanyń «Legııa» komandasyna (0:1, 0:1) esebimen jol berdi.

«Sparta» fýtbol klýby 1893 jyly qurylǵan. Qazirge deıin óz elinde 35 márte chempıon atanyp, rekordtyq kórsetkishke qol jetkizdi.

Eske salsaq, almatylyq «Qaırat» fýtbol komandasy UEFA Chempıondar lıgasy ekinshi irikteý kezeńinde Fınlıandııanyń KýPS komandasyn jeńip, jarystyń úshinshi kezeńine joldama aldy.