Konferentsııa lıgasy: «Astana» portýgalııalyq «Vıtorııa» komandasymen teń tarqasty

ALMATY. KAZINFORM — Almaty qalasyndaǵy Ortalyq stadıonda «Astana» fýtboldan Konferentsııa lıgasynyń 4-týrynda Portýgalııanyń «Vıtorııa» (Gımaraınsh) komandasymen kezdesti.

Osyǵan deıin portýgalııalyq klýb 9 upaımen Konferentsııa lıgasynyń jalpy kestesinde dop aıyrmasyna baılanysty 5-orynda tursa, astanalyqtar (3 upaı) 25-satyda edi.

Alǵashqy segizdikke ilikken komandalar lıganyń 1/8 fınalyna joldama alady. Al 9-24-oryn alǵandar pleı-off básekelerin ótkizip, qalǵan joldamalardy sarapqa salady.

Astanalyqtar alǵashqy oıynynda jeńgenimen, odan keıin túzdegi eki matchqa qosalqy quramdy aparyp, jeńilip qalǵan edi.

Bul joly «Astananyń» bas bapkeri Grıgorıı Babaıan alańǵa negizgi quramdy shyǵardy. Qazaqstan ulttyq quramasynyń oıynshysy ıAn Vorogovskııden basqalardyń bári legıonerler edi. 

Birinshi taım sońyna taman, 40-mınýtta «Astana» sapyndaǵy horvatııalyq Branımır Kalaıtsa esep ashty – 1:0. Ekinshi kezeńde qonaqtar jıirek shabýyldap, elordalyqtar qorǵanysqa den qoıdy. Aqyry 89-mınýtta alańǵa ekinshi taımda shyqqan venesýelalyq Hesýs Ramıres baspen qaqpa buryshyn dál kózdedi – 1:1. Budan keıin esep ózgergen joq.

Osylaısha, upaı sanyn 4-ke jetkizgen «Astana» endi 12 jeltoqsanda Anglııanyń atyshýly «Chelsı» komandasyn qabyldaıdy. Aǵylshyn klýby ázirge birde-bir upaı joǵaltqan joq. 

Eske sala keteıik, budan buryn Konferentsııa lıgasynda «Astananyń» Almatyda «Vıtorııa» komandasyn qabyldaıtynyn jazǵan bolatynbyz.