Konferentsııa lıgasy: «Astana» fýtbolshylary alǵashqy jeńisine qol jetkizdi

Búgin «Astana» fýtbol klýby Konferentsııa lıgasy toptyq kezeńiniń úshinshi týr oıynyn Kosovonyń «Balkanı» komandasymen ótkizdi, dep habarlaıdy Kazinform.

Elordalyq klýb C tobynda synǵa túsedi. Qarsylastary – Horvatııanyń «Dınamo Zagreb» (Horvatııa), Chehııanyń «Vıktorııa Plzen» jáne Kosovonyń «Balkanı».

Búgingi kezdesýde komandalar birden shabýylǵa shyqty. Jeńiske jetken jaǵdaıda ekeýi de týrnır kestesindegi jaǵdaıyn jaqsartyp alatyn edi.

Qazaqstandyq komanda alǵashqy eki oıynda «Dınamo Zagrebten» – 1:5, «Vıktorııa Plzennen» 1:2 esebimen jeńilip qalǵan bolatyn.

Sondyqtan olar birden gol soǵatyn múmkindikti izdedi. Oıynnyń 7-mınýtynda elordalyq klýbtan Kamo Oganesıan esep ashsa, 9-mınýtta «Balkanı» sapynan Edvın Kých tarazy basyn teńestirdi.

Al 23-mınýtta Tımýr Dosmaǵanbetovtiń buryshtamadan áýelete bergen dobyn Abzal Beısebekov baspen soǵyp, «Astanany» taǵy alǵa shyǵardy.

Osylaısha, elordalyq komanda qarsylasynan 2:1 esebimen basym túsip, toptyq kezeńdegi alǵashqy jeńisine qol jetkizdi.

Endi qazaqstandyq klýb aldaǵy oıynyn 9 qarashada Astanada «Balkanıge» qarsy ótkizedi.