Konferentsııa lıgasy: «Astana» elordada «Zımbrý» komandasymen teń tústi

ASTANA. KAZINFORM — UEFA Konferentsııa lıgasy ekinshi irikteý kezeńinde búgin qazaqstandyq «Astana» Moldovanyń «Zımbrý» komandasyna qarsy alǵashqy oıynyn ótkizdi.

Jankúıerler moldovalyq komanda jóninde túrli boljam jasaǵan edi. Elordalyq klýb jarystyń kelesi satysyna eshqandaı qınalmastan shyǵady degen boljam aıtqandar boldy. Dese de oıyn barysynda moldovalyq fýtbolshylar «Astanaǵa» qarsy jınaqy qımyl kórsetti.

Alǵashqy mınýttan elordalyq komanda oıyn tizginin óz qolynda ustaýǵa tyrysty. Qos qanattan jıi shabýyl uıymdastyryp, jyldam gol soǵýǵa kúsh saldy. Degenmen bul maqsatyna jete alǵan joq. Esesine óz qaqpasyna 45-mınýtta gol jiberip aldy. Ony Gaı Dahan óziniń enshisine jazdy.

Ekinshi kezeńde 56-mınýtta «Astana» sapynan Ivan Bashıch tarazy basyn teńestirdi. 

Osylaısha komandalar 1:1 esebine qanaǵat bildirip tarasty.

Qarymta kezdesý 31 shilde kúni ótkiziledi.

Endi Konferentsııa lıgasynda «Aqtóbe» óz alańynda Chehııanyń «Sparta» (Praga) komandasymen sheberlik baıqasady.

Eske salsaq, budan buryn Chempıondar lıgasy ekinshi irikteý kezeńinde almatylyq «Qaırat» Fınlıandııanyń «KýPS» komandasyna ese jiberdi.