Konferentsııa lıgasy: «Astana» «Dınamo Sıtıge» ese jiberip, jarysty aıaqtady
ASTANA. KAZINFORM - Búgin 16 shilde kúni UEFA Konferentsııa lıgasy birinshi irikteý kezeńinde qazaqstandyq «Astana» Albanııanyń «Dınamo Sıtı» komandasymen qarymta oıyn ótkizdi.
Albanııanyń Elbasan qalasynda ótken alǵashqy kezdesýde «Astana» qarsylasynan 1:0 esebimen jeńiske jetti. Kezdesýdegi jalǵyz goldy 69-mınýtta Ramazan Kárimov soqqan edi.
Sondyqtan búgingi oıyn barysynda albanııalyq klýb alǵashqy mınýttan shabýylǵa ıek artty. Soǵan qaramastan olar 24-mınýtta óziniń aıyp alańynda dóreki áreketimen kózge tústi. Tóreshi belgilegen penaltıden Baýyrjan Islamhan múlt ketken joq.
Ekinshi kezeńde albanııalyq klýb belsendiligin arttyrdy. Aldymen 50-mınýtta Brýno Dıta penaltıdi sheber oryndasa, odan keıin 62-mınýtta Hekýran Berısha mergendik tanytty.
Osylaısha «Dınamo Sıtı» 2:1 esebimen alǵa shyqty.
Nátıjesinde eki kezdesýdiń nátıjesi teńesip, oıyn qosymsha kezeńge ulasty.
Qosymsha kezeńde Lorentso Vılıa 93, Mustafa Koma 123-mınýtta gol soǵyp, qorytyndy esepti belgiledi.
Osylaısha «Astana» qarsylasyna 1:4 esebimen ese jiberip, jarysty aıaqtady.
«Dınamo Sıtı» komandasynyń seksen jylǵa jýyq tarıhy bar. Bul klýb 2023 jylǵa deıin jankúıerler qaýymyna «Dınamo Tırana» degen ataýmen jaqsy belgili.
«Dınamo Sıtı» - Albanııadaǵy eń tanymal klýbtardyń biri. Olardyń enshisinde qazirge deıin 18 chempıondyq ataq bar. Degenmen olar sońǵy ret mundaı múmkindikke 2009/2010 jylǵy maýsymda ıe bolǵan edi. Bıyl olar eýrokýbok oıyndaryna qatysýǵa byltyr el kýbogyn jeńip alǵany úshin múmkindik aldy.
