Konferentsııa lıgasy: «Tobyl» jarys jolyn aıaqtady

ASTANA. QazAqparat - Qazaqstandyq «Tobyl» komandasy búgin fýtboldan Konferentsııa lıgasy pleı-off satysynda jarysty aıaqtady, dep habarlaıdy QazAqparat tilshisi.

Qostanaılyq klýb Chehııanyń «Vıktorııa Plzen» ujymymen qarymta oıyn ótkizdi. Birinshi oıynda olar atalǵan qarsylasyna 1:2 esebimen jol berdi.

Sondyqtan búgingi oıyn barysynda qostanaılyq fýtbolshylar alǵashqy mınýttan gol soǵatyn múmkindik izdeıtini anyq edi. Degenmen oǵan chehııalyq klýb múmkindik bergen joq. Oıyn basynan tizgindi óz qolyna alýǵa tyrysty. Qostanaılyq ujym negizinen qarymta shabýyldarǵa ıek artty.

Oıynnyń 32-mınýtynda «Vıktorııa Plzen» sapynan Tomash Hory esep ashsa, 59-mınýtta Rafıý Dýrosınmı basymdyqty arttyrdy.

Al 93-mınýtta Ibraım Traore chehııalyq klýbtyń úshinshi golynyń avtory atandy.

Osylaısha, «Tobyl» qarsylasyna 0:3 esebimen ese jiberdi.

Aıta ketsek, Konferentsııa lıgasynyń alǵashqy úsh irikteý satysynda qostanaılyq klýb Fınlıandııanyń «Honka» (0:0, 2:1), Shveıtsarııanyń «Bazel» (3:1, 1:2), Soltústik Irlandııanyń «Derrı Sıtı» (2:1, 0:1) klýbtaryn qapy qaldyrdy.

Dál qazir Konferentsııa lıgasy pleı-off satysynda qazaqstandyq «Astana» syrt alańda Albanııanyń «Partızanı» klýbymen kezdesip jatyr.

Alǵashqy oıynda elordalyq klýb qarsylasyn 1:0 esebimen tize búktirgen edi.

Aıta ketsek, qazaqstandyq «Ordabasy» jáne «Aqtóbe» Konferentsııa lıgasy úshinshi irikteý satysynda jarys jolynan shyǵyp qaldy.

Eske salsaq, 31 tamyzda fýtboldan UEFA Chempıondar lıgasy toptyq kezeńiniń jerebesi tartyldy.