Konferentsııa lıgasy: «Aqtóbe» jarystyń úshinshi satysyna joldama aldy

ASTANA. QazAqparat – Búgin fýtboldan UEFA Konferentsııa lıgasy ekinshi irikteý satysynda qazaqstandyq «Aqtóbe» Grýzııanyń «Torpedo Kýtaısı» komandasyn qapy qaldyrdy, dep habarlaıdy QazAqparat tilshisi.

Aqtóbelik klýb oıyn basynan tizgindi óz qolyna alýǵa tyrysty. Jyldam gol soǵý múmkindigin izdedi. Nátıjesinde oıynnyń 32-mınýtynda aqtóbelik klýbtan Maksım Samorodov esep ashqan edi.

Ekinshi kezeńde grýzııalyq komanda tarazy basyn teńestirýge umtyldy. Aldymen Georgıı Arabıdze 58-mınýtta gol soqsa, odan keıin 66-mınýtta Iraklıı Býgrıdze óz klýbyn alǵa shyǵardy.

Eki komanda arasyndaǵy alǵashqy kezdesýde «Aqtóbe» qarsylasynan 4:1 esebimen basym túsken edi.

Endi «Aqtóbe» jarystyń úshinshi satysynda 10 jáne 17 tamyz kúnderi TsSKA Sofııa (Bolgarııa) jáne «Sepsı» (Rýmynııa) jubynyń jeńimpazymen kezdesedi. Eki komanda arasyndaǵy búgingi kezdesýde rýmynııalyq klýb 1:0 esebimen alda tur. Alǵashqy oıynda «Sepsı» 2:0 esebimen basym túsken bolatyn.

Aıta ketsek, budan buryn Konferentsııa lıgasy ekinshi irikteý satysynda qostanaılyq «Tobyl» Shveıtsarııanyń «Bazel» klýbyn (3:1 1:2) qapy qaldyrdy.

Endi elorda ýaqytymen 00.50-de shymkenttik «Ordabasy» Polshada jergilikti «Legııamen» sheberlik baıqasady.