Konfederatsııa kýbogy: Qaı oblys top jardy
ASTANA. QazAqparat - Almatydaǵy Balýan Sholaq atyndaǵy sport kesheninde 2017 jylǵy Konfederatsııa kýbogy óz máresine jetti, dep habarlaıdy QazAqparat.
Sporttyń alty túri boks, grek-rım, erkin, dzıýdo jáne qazaq kúresinen, sondaı-aq, taekvondodan saıysqa túsken ár óńir sportshylary ózara kil myqtylardy anyqtady.
Endi osy sport túrleri boıynsha qaı oblys sportshylary jeńimpaz bolǵanyna toqtalaıyq.
Boks:
Bokstan Ońtústik Qazaqstan oblysynyń bylǵary qolǵap sheberleri top jardy. Olar fınalda Mańǵystaý oblysynyń komandasyn 7:3 esebimen utyp, Konfederatsııa kýbogynyń ıegeri atandy.
Grek-rım kúresi:
Grek-rım kúresi boıynsha Almaty oblysy bas júldeni jeńip aldy. Olar fınalda Qaraǵandy oblysynyń sportshylaryn 5:3 esebimen qapy qaldyrdy.
Erkin kúres:
Erkin kúresten Almaty oblysynyń balýandary Konfederatsııa kýbogyn qanjyǵalaryna baılady. Olar fınalda Shyǵys Qazaqstan oblystarynyń balýandarymen 4:4 esebimen teń túsken bolatyn. Alaıda, uıymdastyrýshylar teń nátıjeniń jeńimpazdaryn eki oblystan kelgen balýandardyń kúresý máneri men ádis jasaý sapasy boıynsha baǵalap, 42:40 esebimen Almaty oblysynyń balýandaryn úzdik dep tapty.
Dzıýdo:
Dzıýdo kúresinen Qaraǵandy oblysynyń balýandary myqty ekenderin dáleldedi. Olar fınalda Aqtóbe oblysynyń balýandaryn 4:1 esebimen oısyrata jeńdi.
Taekvondo:
Taekvondo sporty boıynsha Almaty qalasynyń sportshylary úzdik ekenin moıyndatty. Olar fınalda Almaty oblysynan kelgen qarsylastaryn 72:42 esebimen utyp, Konfederatsııa kýbogyn qanjyǵalaryna baılady.
Qazaq kúresi:
Konfederatsııa kýbogyna bıyl tuńǵysh ret qosylǵan qazaq kúresinen «Almaty qalasynyń sport klýby» jeńimpaz atandy. Olar fınalda «Qaraǵandy oblysynyń sport klýby» 5:3 esebimen utyp, jeńimpaz atandy.
Osylaısha sporttyń 6 túrinen ótken Konfederatsııa Kýbogy ózara myqtylardy anyqtady. Sporttyń ár túrinen jeńimpaz atanǵan komandalarǵa 25 mıllıon teńgeden qarjylaı syıaqy tabystaldy.
