Kóne jádigerler, erekshe qarý-jaraqtar, tarıhı jazbalar - 18 mamyrda Mýzeı túni ótedi
Mádenı is-shara barysynda Ortalyq mýzeı qory jáne jeke kollektsııalar negizinde uıymdastyrylǵan birneshe jańa kórme ashylady.
«Er jigittiń bes qarýy boıynda...» kórmesiarqyly mýzeı qonaqtary Memlekettik ortalyq mýzeıiniń erekshe qarý-jaraq kollektsııasymen tanysa alady. Kórmede qazba jumystary barysynda tabylǵan arheologııalyq ekspedıtsııa materıaldary: naıza ushtary, súńgi, jebeler, qola qylyshtar, qanjarlar men pyshaqtar, sondaı-aq qazaq ulttyq qarýlary – sadaq, jebe, qoramsaq, qyn, qylysh, qanjar, pyshaq, naıza, aıbalta, soıyl, shoqpar, qorǵanysqa arnalǵan jaraqtar – dýlyǵa, qalqan, sharaına, kise beldikter jáne 1916 jylǵy ult-azattyq kóterilisi, Ekinshi dúnıejúzilik soǵystary kezinde qoldanǵan qarý túrleri de kópshilik nazaryna usynylady.
Qazaqstan Sýretshiler odaǵynyń múshesi, sáýletshi, sýretshi, Tamara Volkovanyń «Kóne jádigerlerdiń ómiri men sımvolıkasy» atty kórmesinde qylqalam sheberiniń 80-nen astam týyndylary, sonymen qatar, elimizdiń belgili tulǵalary men kásibı sýretshileriniń «XXI ǵasyr kóshbasshylary men tanymal tulǵalary. Birlesken shyǵarmashylyq» shyǵarmashylyq jobasy negizinde týyndaǵan kartınalary usynylady. Tuńǵysh ret uıymdastyrylyp otyrǵan atalmysh joba 100-ge jýyq elimizge eńbegi sińgen tanymal tulǵalar – Asanáli Áshimov, Oljas Súleımenov, Nurǵalı Núsipjanov, Roza Rymbaeva, Bıbigúl Tólegenova, Maqpal Júnisova jáne t.b. óner jáne qoǵam qaırakerleriniń qatysýymen iske asyryldy. Merekelik jıynǵa arnaıy qatysyp otyrǵan mádenıet jáne qoǵam qaıratkerleri «MÝZEI TÚNІ-2023» qonaqtaryn quttyqtaıdy dep kútilýde.
«Mýzeı túni» aktsııasynyń aıasynda «Ulttyq mura – urpaqqa amanat» atty art-plener uıymdastyrylyp, Qazaqstannyń 15 tanymal sýretshisi óz týyndylarynyń tusaýyn kesedi. Qylqalam sheberleri Halyqaralyq mýzeı kúni kásibı merekesine oraı Ortalyq mýzeıge jańa jumystaryn syıǵa tartyp, mýzeıdiń keskindeme qoryn tolyqtyrady. Art-plenerdiń demeýshisi – «Chjýnsıngoven» úkimettik emes uıymy jáne 2016 jyly Almaty qalasynda qurylyp, Qytaı men Qazaqstan arasyndaǵy yntymaqtastyqtyń artýyna dáneker bolǵan «Búgingi Jibek joly» basylymy.
«Úsh dinniń biregeı jazba úlgileri: Táýrat, Іnjil, Quran» – «Úsh zat-úsh tarıh» atty kórme aıasynda mýzeılik taqyryptyq sabaq ótkizilip, erekshe jáne sırek kezdesetin rýhanı jádigerler negizinde, ıaǵnı, buzaý terisine jazylǵan Táýrat (XIV-XV ǵǵ.), 1751 j. jaryq kórgen Іnjil jáne Túrkııada jazylǵan Quran (XVIII-XIX ǵǵ.) sııaqty qundylyqtarmen mýzeı kelýshileri tanysa alady.
Mýzeı túni sharasy aıasynda basqa da, atap aıtqanda zamanaýı tehnologııalardy qoldanatyn sándik-qoldanbaly óner jáne dástúrli qolóner túrleri boıynsha sheberlik sabaqtaryn «Sheberler aýyly» qolónershileri ótkizedi. Aktsııaǵa qatysýshylar kıiz basý, júnnen sýret jasaý, gıpsten fıgýralar, keskindeme, qysh, zergerlik buıymdar, bıser buıymdary, keste tigý, balshyqtan modeldeý, kórkem keramıka, kilem toqý, aǵash óńdeý jáne metall óńdeý boıynsha sheberlik sabaqtaryna qatysýǵa múmkindik alady.
Sheberlik sabaqtaryn Qazaqstan jáne Ózbekstannyń belgili sheberleri, O.Tańsyqbaev atyndaǵy Almaty sándik-qoldanbaly óner kolledjiniń stýdentteri men oqytýshylary, T. Júrgenov atyndaǵy Qazaq ulttyq óner akademııasy janyndaǵy kolledj jas sheberleri, «Salta-Art» art-stýdııasy jáne Almaty Oqýshylar saraıynyń sheberleri ótkizedi.
Merekelik shara barysynda «Topjarǵan» etno-mádenı ortalyǵy ańshylar sherýin uıymdastyryp, qazaq saıatshylyq kásibin kópshilikke tanystyrsa, «Sal-seri» etnosport federatsııasynyń ókilderi ulttyq «sadaq atý» sport túrin, al Danııar men Asylgúl Baıdaraly «Bes qarý» ónerin pash etedi.
Balalarǵa arnalǵan Kovorkıng ortalyǵynda «Jeti qazyna», «Qazaq zergerlik buıymdary», «Uly Jibek joly» taqyryptarynda mýzeılik sabaqtary men mádenı-tanymdyq is-sharalar ótkiziledi.
Mýzeı túnine belgili óner juldyzdary, memlekettik orkestrler men mýzykalyq shyǵarmashylyq toptar: Tengri Group, Z.Altynbaeva, J.Serkebaeva, A.Eńsepov, O. Tatamırov, T.Raqymbaev, «MEZZO» vokaldyq toby, QR Halyq ártisi M.Serkebaevtyń basqarýymen Almaty qalasy Ákimdiginiń kontserttik orkestri, M. Tólebaev atyndaǵy mýzyka mektebiniń oqýshylary, «Beren» vokaldyq toby, «Shabyt» jáne «Kerbez» bı ansamblderi, «Názik» jetigenshiler ansambli, Baýyrjan Táńirbergen, Oljas Sherhan, Qýandyq Úsen, Rýslan Nurǵalı jáne t.b. óner kórsetedi.
Sondaı-aq, mýzeı qonaqtary etnıkalyq stılde bezendirilgen túrli-tústi fotozonada sýretke túse alady.
Mýzeı qonaqtaryn saq patshaıymy Tomırıs pen saq jaýyngeri Altyn adam sán-saltanatymen kútip alady.
