Kóne kartalar kórmesi Batys Eýropa saıahatshylarynyń Ortalyq Azııany 2 myńnan astam jylǵa sozylǵan taný protsesin aıshyqtap kórsetedi
ASTANA. 6 maýsym. QazAqparat - Seısenbi kúni, 12 maýsymda saǵat: 16.00-de «Nazarbaev ortalyǵy» kóp fýnktsııaly ǵylymı-taldamalyq jáne gýmanıtarlyq-aǵartýshylyq memlekettik mekemesinde
(Astana q., Respýblıka dańǵyly, 2) «Kartalar men saıahattar: Uly Aleksandrdan Patshaıym Vıktorııaǵa deıingi Eýropanyń Qazaqstandy tanýy» atty kóne kartalar kórmesiniń ashylý saltanaty ótedi.
Kórmege saıasattaný ǵylymdarynyń doktory Naıdjel Gýld-Devıstiń jeke kollektsııasynan alynǵan Batys Eýropa saıahatshylarynyń Ortalyq Azııa aýmaǵyn, kóshpelilerdiń salt-dástúri men mádenıetin taný protsesin aıshyqtap kórsetetin kóne kartalar qoıylady.
Naıdjel Gýld-Devıs Oksford Ýnıversıtetinde halyqaralyq qatynastar páninen dáris bergen, keıingi on jylda Brıtan dıplomatııalyq qyzmetinde jumys jasady. Jumys babymen 2010 jyly Astanaǵa keldi.
Qazaqstanmen jaqyn tanysýy onyń Ortalyq Azııa aýmaǵy týraly kartalardyń túpnusqasynan kollektsııa jınaýǵa degen qyzyǵýshylyǵyn oıatty.
Kórme 2012 jyldyń 12 maýsymynan bastalyp, 12 shildesine deıin sozylady.
Kórmeniń ashylýyna memlekettik organ ókilderi, dıplomatııalyq korpýs, halyqaralyq jáne úkimettik emes uıymdar, ǵylymı-taldaý ortalyqtary, BAQ, kórnekti mádenıet pen óner jáne ádebıet qaıratkerleri qatysady.
