Kóne Bozoq qalashyǵy ornynda oqýshylarǵa ashyq sabaq ótkizildi

ASTANA. QazAqparat - 16 qyrkúıekte Astana qalasynyń ákimdigi elordanyń oqýshylary men stýdentteri úshin Ilınka turǵyn úı alabyna jaqyn jerde ornalasqan kóne Bozoq qalashyǵy ornynda ashyq sabaq ótkizdi, dep habarlaıdy qala ákimdiginiń resmı saıty. 

Shara barysynda belgili tarıhshylar men arheologtar jastardy VI-XV ǵasyrlarǵa jatatyn Bozoq qalashyǵynyń tarıhymen tanystyrdy.

-«Rýhanı jańǵyrý» baǵdarlamasy aıasynda Astana ákimdigi tarapynan kóptegen is-sharalar ótkizilýde. Onyń ishinde eń mańyzdy baǵyttarynyń biri «Týǵan jerdi» júzege asyrýǵa erekshe mán berilýde. Bıyl 2 qyrkúıekte barlyq mektepterde týǵan ólkeniń, jalpy el tarıhyna arnalǵan sabaqtar ótkizildi. Bul jumystardyń jalǵasy retinde búgin Bozoq qalashyǵy ornynda oqýshylar men kolledj, joǵary oqý oryndarynyń stýdentteriniń qatysýymen ashyq sabaq uıymdastyryldy. Óskeleń urpaq óziniń týǵan jeriniń tarıhyn tanýǵa qyzyǵýshylyq tanytýda. Búgingi sapar barysynda balalar ýaqyt baılanysyn sezinip, bul tarıhı oryn týraly bilip, erekshe áser aldy dep oılaımyn, - dedi Astana qalasy ákiminiń orynbasary Ermek Amanshaev. 

Onyń sózinshe, elorda ákimdigi erekshe tarıhı oryndardy saqtaý úshin keshendi sharalar ázirleýde.

-Qazir biz «Kıeli Astana» kartasyn daıyndaýdamyz. Oǵan 20-ǵa jýyq tarıhı, mádenı eskertkishter enedi. Sondaı-aq biz ol eskertkishterdi konservatsııalaý, qaıta qalypqa keltirý, mýzeefıkatsııalaýdan ótkizemiz. Onyń ishinde bul karta aıasynda Bozyqty da mýzeefıkatsııalaý máselesi qaralý kerek. Sonda bul tarıhı mekenge tek oqýshylar ǵana kelmeıdi, qalanyń qonaqtary da at basyn buratyn bolady, - deıdi qala basshysynyń orynbasary.