Kóne aspaptardy meńgergisi keletin jastar az – etnomýzykant Edil Qusaıynov

ASTANA. KAZINFORM – «Bir ózi - bir orkestr» atanyp ketken Edil Qusaıynov - ejelgi saqtar men ǵundar dáýiriniń máńgilik áýenin búgingi jańa ǵasyr mýzykasymen jalǵastyryp, qazaq ulttyq mádenıetin álemdik sahnada jańǵyrtyp júrgen talant ıesi. Etnomýzykant «JibekJoly» arnasyndaǵy «BúginLive» baǵdarlamasyna suhbat berip, birneshe aspapty qalaı meńgergenin baıandady.

– Meniń boıymdaǵy talannyń 99 paıyzy taza eńbekpen kelgen dúnıe. Ásirese, ustazdarym men ata-anamnyń sińirgen eńbegi kóp. Osy aspaptardy jınaǵan Bolat Sarybaev aǵamyzdan shabyt alamyn. Eńbek jolymda Qurmanǵazy, «Otyrar sazy» orkestrinde istedim. Qazir Astanadaǵy fılarmonııada qyzmet etemin. Ári ýnıversıtette sabaq beremin, - deıdi Edil Qusaıynov.

Ánshi óziniń bilgen-túıgenin keıingi urpaqqa úıretý – azamattyq ári ustazdyq paryz dep esepteıtinin aıtty. Alaıda ol naqty kóne aspaptardy meńgergisi keletin jastar sany az ekendigin aıtady.

– Naqty meniń pánime kelgisi keletinder kóp dep aıta almaımyn. Almatyda jumys istep júrgen kezimde shákirtterim kóp bolatyn. Men negizi kásibı kompozıtormyn. Maǵan ándi oryndap, ózgege úıretkennen góri, shyǵarǵan ońaı. Degenmen kontsertterde óner kórsetýge shaqyryp turady, - dedi sazger.

Aıta keteıik, Edil Qusaıynov túrki aspaptarynyń tylsym kúshterin nasıhattaýshy, kóne aspaptardy jetik meńgergen maman, ánshi, kompozıtor, etnomýzykant. Qazaqstannyń eńbek sińirgen qaıratkeri, «Qurmet» ordeniniń ıegeri. El ishinde «Bir ózi – bir orkestr» atanyp ketken. Jetigen, sybyzǵy, shańqobyz jáne basqa da úrmeli-soqpaly aspaptardy jetik meńgergen.

Spıkerdiń sózinshe, onyń ata-anasy da óner jolynda eńbek etken. Ákesi sazger, dombyrashy. Al, anasy – qobyzshy.

-Sondyqtan, meniń de ónerge kelýim tegin emes. Osyndaı ónerli otbasynan shyqqandyqtap, ulttyq aspaptar maǵan etene jaqyn tanys. Bala kúnimnen mýzyka mektebinde oqydym. Ári qaraı kolledjde pıanıno baǵyty boıynsha bilimimdi shyńdadym,- deıdi ánshi.

Osyǵan deıin Úrimjide qazaqtyń mýzykalyq aspaptarymen tanysýǵa keletinderdiń qarasy qalyń ekeni týraly jazdyq.