Qondyrǵy buzylǵan: Atyraý munaı óńdeý zaýyty basshysynyń birinshi orynbasary jumystan bosatyldy
«QazMunaıGaz» UK AQ basqarma tóraǵasy Maǵzum Myrzaǵalıev Atyraý munaı óńdeý zaýytynda katalıtıkalyq krekıng qondyrǵysy toqtaǵannan keıin bastalǵan jóndeý jumystarynyń barysyn tekserdi.
1 aqpanda Atyraý munaı óńdeý zaýyty regeneratorlarda temperatýranyń kóterilýine baılanysty katalıtıkalyq krekıng qondyrǵysyn toqtatty.
M. Myrzaǵalıev 3 aqpan kúni Atyraý munaı óńdeý zaýytyna jumys saparymen baryp, kásiporyn basshylyǵymen keńes ótkizdi.
«QazMunaıGaz» basshysy QMG Basqarma tóraǵasynyń munaı óńdeý jáne munaı hımııasy jónindegi orynbasary Arman Qaırdenovtiń jetekshiligimen jedel shtab qurýdy tapsyrdy. Jedel shtab AMÓZ jabdyqtaryndaǵy aqaý tolyq joıylǵanǵa deıin jumys isteıdi.
«Shtabtyń negizgi mindeti – oryn alǵan aqaýdy, sondaı-aq AMÓZ jumysynda júıeli sıpat alǵan máselelerdi jedel ári sapaly sheshý. Orynbasarym Arman Qaırdenov bul daǵdarystan tolyq shyqqanǵa deıin osynda bolady», - dep atap ótti M.Myrzaǵalıev.
Keńes barysynda «AMÓZ» JShS bas dırektorynyń birinshi orynbasary Rahymjan Janǵabylov qyzmetinen bosatyldy, kásiporynnyń bas dırektory Murat Dosmuratovqa qatań sógis jarııalandy.
M. Myrzaǵalıev sondaı-aq qurylǵan shtabtyń basshysy A.Qaırdenovke oqıǵaǵa qatysty qyzmettik tergeý júrgizýdi jáne onyń qorytyndysy boıynsha qosymsha kadrlyq sheshimder qabyldaýdy tapsyrdy.
«QazMunaıGaz» basqarma tóraǵasy el boıynsha otyn tapshylyǵyna jol bermeý maqsatynda ashyq tústi munaı ónimderin kóbirek óndirý úshin barlyq úsh munaı óńdeý zaýytynyń júktemesin ońtaılandyrýdy tapsyrdy.
«El basshylyǵynyń AMÓZ-ge qatysty birneshe ret aıtqan eskertýlerin, sondaı-aq zaýyt jumysyndaǵy jıi úzilisterdi eskere otyryp, barynsha qatań sharalar qabyldaıtyn bolamyz. Elde ishki naryqty munaı ónimderimen qamtamasyz etý máselesi asa ózekti bolyp turǵanda mundaı jaǵdaıǵa jol berýge bolmaıdy», - dep túıindedi M.Myrzaǵalıev.
