Kondýktor Gúlnár Meıirmanova: Adam júzinde jylylyq, sózinde syılastyq bolýy kerek
ÓSKEMEN. QazAqparat – Zeınet jasynan asqan óskemendik Gúlnár Meıirmanovanyń kondýktor bolyp jumys istep júrgenine 10 jyldan asty. Avtobýsqa mingen jolaýshylardyń kóbi ony tanyp, jyly shyraımen amandasyp jatady. Sebebi ár adammen ázildesip, kúlimdeı sóılesetin, qajet kezde qoldap, demeý bildiretin kondýktor kóptiń rızashylyǵyna ıe, dep habarlaıdy QazAqparat.
Ádette,kondýktordyń jumys kúni óte erte bastalady. Keıbir qala turǵyndary tańǵy 7-de uıqydan endi oıanyp jatsa, kondýktorlar saǵat 04.50-de jumys ornynda bolady.
– Bul avtobýstyń júrý kestesine qaramastan, barlyǵy úshin ortaq talap. Keıbir kondýktorlarda alǵashqy tasymal 5.30-da, endi bireýlerde 5.45-te nemese 6.00-de. Qalaı bolǵanda da saǵat beske on qalǵanda túgeldeı bazaǵa jetýge tıispiz deıdi Gúlnár Meıirmanova..
Avtobýsy jolǵa erte shyqqandar keshki saǵat 20.00-den keıin úılerine qaıtady. Al jumysty kesh bastaǵandar 22.45-ke taman ǵana bosaıdy. Jas kondýktorlar ózinen úlken, tájirıbeli apaılarǵa «jumys tym aýyr. Kúni keshke deıin aıaqta tik turamyz» dep shaǵymdanyp jatady.
– Men olarǵa «bul degen gımnastıka emes pe? Aıaq pen qolǵa jattyǵý dep qaljyńdap, kóńilderin kóterýge tyrysamyn», – deıdi Gúlnár Ádilhanqyzy. – Onyń ústine bizdiń mindetke salon ishin jýý da kiredi. Mysaly ózim avtobýstyń edenin kúnine eki-úsh ret jýyp shyǵamyn. Bir sózben aıtqanda, kondýktor – kúndelikti qozǵalysta.
Apaılarynyń sózin estigen qyzdar tańdanyp ta qalatyn kórinedi. Rasymen de egde jastaǵy kisiden osyndaı kózqarasty eshkimniń kútpeıtindigi anyq. Gúlnár Meıirmanova «Marat-M» kompanııasyndaǵy jasy eń úlken kondýktor. Zeınetkerlikke shyqqanyna 6 jyl ótse de óz jumysyn jalǵastyrýda. Áriptesterin demeýden sharshamaıdy. Tek olarmen ǵana emes, jolaýshylarmen de jaqsy aralasa biledi.
Jumys barysynda ártúrli jaǵdaılardyń da kezdesetini bar.
Birde qańtardyń qaqaǵan aıazynda qoǵamdyq kólikke kirip kelgen áıel birden óz narazylyǵyn bildirgen: «Áı, myna avtobýstaryńyz nege sýyq?».
–«Iá, ystyq emes», – dep kelisken Gúlnár Meıirmanova ary qaraı óz sózin kúlimsireı jalǵastyrady. «Biraq osydan 5 mınýt buryn odan da sýyq edi. Siz kirgennen keıin birden jylynyp qaldy. Jumysymyzǵa túsinistikpen qaraǵanyńyz úshin raqmet».
Muny estigen jolaýshy ashýly keıpin joǵaltyp, júzine kúlki úıiriledi. Bir qyzyǵy, araǵa birshama ýaqyttan keıin avtobýsqa eki qarııa mingen. Sol kezde Gúlnár apaı: «Qurmetti jolaýshylar! Bizdiń aramyzǵa orta jastaǵy eki adam qosyldy»,-deıdi daýystap. Japyryla qaraǵandarǵa, «jo-joq, qate estimedińizder, egde jastaǵy emes, orta jastaǵylar» demes pe. Avtobýs ishi kúlkige kómilgen. Jastar jaǵy atyp turyp oryn bergen.
Birazdan soń taǵy bir áıel salonǵa kóteriledi. Bul kisi de sol orta jastaǵylardyń sanatynan sekildi. Biraq ol jeke kýáligin kórsetkisi kelmeıdi. Tipti ashýǵa býlyǵyp: «myna tıyn-tebenińdi al da ármen júrshi», – deıdi kondýktordy jaqtyrmaı.
Al Gúlnár Meıirmanova bolsa sabyrly únmen: «yńǵaısyzdyq tanytqanym úshin keshirińiz. Bet-álpetińizge qarasam, jas kórinedi ekensiz. Sondyqtan naqty neshede ekenińizdi anyqtaý qıynǵa soǵyp tur», – dep jaýap bergen.
Osy arada birer saýal tastaýǵa týra keldi.
– Adamdarmen jumys istegen aýyr ma?
– Joq. Kerisinshe qyzyqty.
– Aşy sýdan urttap alǵan jolaýshylar qıyndyq týdyrmaı ma? Mysaly táltirektep áreń turǵan er adam aqsha tólemeı qoısa, qaıda baratynyn da aıtpasa, ne isteısiz?
– Ony shet shaqqa qaraı jaıǵastyryp, «tynysh otyr. Uıyqtap alsań da bolady. Tek basqa jolaýshylardyń mazasyn alma. Áıtpese seni polıtsııanyń bekinis pýnktine aparyp tastaımyz»,- dep qatań eskertemin.
– Al eger tekserýshi kirip qalsa she? Onyń bıleti joq qoı.
– Jaǵdaıdy túsindiremin. Tekserýshi de adam emes pe? Onyń da januıasy bar. Mas kisi – bireýge kúıeý, bireýge áke, bireýge aǵa. Sýyqta dalaǵa qýyp shyqpaımyn ǵoı. Dittegen jerine jetip alsyn. Tosyp otyrǵan jaqyny bar shyǵar. Tipti kóbisi aıaldamadan túserde esin jıyp, aqshasyn tólep ketedi.
– Sonda siz mas jáne ashýshań jolaýshylarǵa renjimeısiz be?
– Joq. Olar qandaı da bir qıyndyqqa tap bolǵan nemese kúıbeń tirliktiń qam-qareketinen sharshaǵan jandar dep túsinemin.
Qoǵamdyq kólikte adam az bolǵan kezde zerigip ketemin. Keshke qaraı jumystan qaıtqan jurt avtobýsqa mingende úıge tezirek jetkileri kelip otyrady. Qaryndary ash. Birqatarynyń basy aýyryp turǵandyǵyn da baıqaımyn. Osy kezde bárine jaqsy-kóńil kúı syılaý úshin ázildep, kóńilderin kóterýge tyrysýǵa da týra keledi.
Meıram demekshi, jyl saıyn jeltoqsannyń aıaǵynda Gúlnár Meıirmanova aqshaqar bolyp kıinedi. Osylaı 30 jáne 31 jeltoqsan kúnderi tańerteńnen keshke deıin jolaýshylardy quttyqtaıdy.
«Bul meniń emes, basshylyǵymyzdyń bastamasy. Júrgizýshi men kondýktorlardyń ertegi keıipkerlerine aınalyp júrgenine birneshe jyl boldy. Ár túrli baǵyttaǵy avtobýstarǵa kirip óleń oqyp, turǵyndarǵa kámpıt beremiz. Kompanııa ıeleri arnaıy aqsha bóledi. Mundaǵy negizgi maqsat – kópshilikke azdaǵan bolsa da qýanysh syılaý.
Bir qyzyǵy, Gúlnár Meıirmanova aqshaqar bolýǵa ózi nıet bildirgen. Kondýktorlar ujymynyń ishinde eń úlkeni bolsa da kóńili jas. Ony kórgen jolaýshylar rızashylyqtaryn bildirip, birge fotosýretke túsip te jatady.
