Kondomınımýmdy basqarý organdary toqsan saıyn esep berýge mindetteledi - Q. Óskenbaev
ASTANA. QazAqparat - Kondomınımýmdy basqarý organy páter ıeleriniń aldynda toqsan saıyn esep berýge mindetti bolady. Búgin Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda Ulttyq ekonomıka vıtse-mınıstri Qaıyrbek Óskenbaev málim etti. Eske salaıyq, komıtet otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
Toqtala ketetin jaıt, zań jobasyna sáıkes, kondomınımým nysanyn basqarý organynyń ashyqtyǵyn qamtamasyz etý normalary qarastyrylyp otyr. «Bul rette kondomınımým nysanyn basqarý organynyń mindettemelerine toqsan saıyn páter ıeleriniń aldynda esep berý normasy da qamtylyp otyr. Basqarýshylar ortaq múlikti basqarýǵa qatysty shyǵystar týraly esepti jazbasha túrde nemese elektrondyq qujat túrinde usynatyn bolady», - dedi Q. Óskenbaev.
Onyń aıtýynsha, osy normany júzege asyrý maqsatynda keleshekte kondomınımým nysanyn basqarýshylar arnaıy saıttar da ashatyn bolady, onda páter ıeleri tikeleı basqarý jumysyna elektrondy daýys berý arqyly qatysatyn bolady.
«Budan bólek, zań jobasy boıynsha tutynýshylar aldynda kommýnaldyq qyzmetti sapaly kórsetý maqsatynda ulttyq standarttar men tehnıkalyq reglamentterdi saqtaýǵa mindetteý talaptary belgilenetin bolady», - deıdi vıtse-mınıstr.
