Kondıterlik ónimder satatyn iri kompanııaǵa qatysty tergeý júrip jatyr

ASTANA. KAZINFORM – Pavlodar oblysy boıynsha Básekelestikti qorǵaý jáne damytý agenttiginiń departamenti «KDV Qazaqstan» JShS-ge qatysty ústemdigin asyra paıdalaný belgileri boıynsha tergeýdi bastady. Bul týraly Básekelestikti qorǵaý jáne damytý agenttiginiń baspasóz qyzmeti habarlady. 

— Kompanııa qyzmetine júrgizilgen taldaý nátıjesinde mekemeniń taýarlarǵa ártúrli baǵa qoıǵany anyqtaldy. Naqtyraq aıtqanda, kondıterlik ónimderdi satý kelisimshartyna túrli baǵa men talap qoldanǵan. Mundaı faktiler antımonopolııalyq zańnamanyń buzylýyn kórsetýi múmkin, — delingen habarlamada.

Buǵan deıin monopolııaǵa qarsy organ «KDV Qazaqstan» JShS-ne anyqtalǵan zań buzý belgilerin erikti túrde joıý týraly habarlama joldady. Ol oryndalmaǵan soń, tergeý isi qozǵaldy.

Tergeý barysynda kompanııa áreketine quqyqtyq baǵa berilip, jetkizý sharttaryn dıfferentsıalaýdyń obektıvti negizi bolý-bolmaýy qaralady. 

Aıta ketelik Básekelestikti qorǵaý jáne damytý agenttigi «Qazaqtelekom» AQ-ǵa qatysty tergeý bastaǵan edi.