Kondıterlik óniminen tyshqan shyqqan kásiporynǵa aıyppul salyndy
NUR-SULTAN. QazAqparat – Astanadaǵy balalardy ońaltý ortalyǵyna kondıterlik ónim jetkizgen kásiporynǵa 350 myń teńge aıyppul salyndy, dep habarlaıdy QazAqparat tilshisi.
Bul týraly Nur-Sultan qalasynyń sanıtarııalyq-epıdemıologııalyq baqylaý departamentiniń baspasóz qyzmeti habarlady.
«Nur-Sultan qalasynyń sanıtarııalyq-epıdemıologııalyq baqylaý departamenti «University Medical Center» korporatıvtik qorynyń Balalardy ońaltý ulttyq ortalyǵynda kondıterlik ónimnen bógde materıal (tyshqan) shyqqanyna baılanysty atalǵan ónimdi óndirýshi men jetkizýshiniń ústinen jospardan tys tekserý júrgizilgenin habarlaıdy.
Tekserý kezinde unnan jasalǵan kondıterlik ónimderdi óndirý tsehy tıisti oryndarǵa óziniń qyzmetin bastaǵany týraly habarlamastan qyzmetin júzege asyrǵandyǵy anyqtaldy. Sanıtarııalyq qaǵıda talaptarynyń, onyń ishinde tamaq ónimderin óndirýdiń tehnologııalyq protsesi boıynsha birqatar buzýshylyqtar anyqtaldy», - delingen departamenttiń dereginde.
Departament mamandary anyqtaǵan zańsyzdyqtar boıynsha kásipkerlik nysan Ákimshilik quqyq buzý kodeksindegi 425-baptyń 1-bóligi boıynsha 352 245 teńge kóleminde aıyppul tóleıtin boldy. Al kásiporynnyń qyzmetin bastaǵany týraly habarlamaǵany týraly materıaldar Ákimshilik quqyq buzý kodeksiniń 463-babynyń 1-bóligi boıynsha sotqa jiberilip, sanıtarııalyq nusqama berilgen.
«QR Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Nur-Sultan qalasy boıynsha departamentine óndiriletin ónimge sáıkestik týraly berilgen deklaratsııanyń zańdylyǵyn anyqtaý jáne onyń kúshin joıý týraly máseleni qaraý jóninde hat joldandy.
Departament bıznes sýbektilerine aýtsorsıngtik kompanııalar men tamaq ónimderin jetkizýshilerdi tańdaýda muqııat bolýdy usynady. Qajet bolsa, obektige baryp, onyń durys sanıtarlyq jaǵdaıyna kóz jetkizgen jón. Bul bolashaqta osyndaı jaǵdaılardy jáne tamaqtan ýlaný qaýpin boldyrmaýǵa kómektesedi», - dep jazylǵan resmı aqparatta.
