Kondıtsıoner pnevmonııa týdyrýy múmkin be
ALMATY. QazAqparat – Almaty Ftızıopýlmonologııa ortalyǵynyń juqpaly aýrýlar bóliminiń meńgerýshisi, ftızıohırýrg, pýlmonolog Abzal Malbasqanov koronavırýsqa qatysty onlaın suhbat ótkizdi, dep habarlaıdy QazAqparat tilshisi.
Maman halyq arasynda taralǵan ótirik-shyny aralas gıpotezalarǵa da túsinik berdi.
«Kondıtsıoner únemi jedel ótkir vırýstyq respıratorly aýrýǵa shaldyqqan, sýyq tıgen adamnyń jaǵdaıyn odan ári asqyndyrýy múmkin faktorǵa jatady. Kóshede, ofıste, kólikte 35-40 gradýs ystyq bolǵan jaǵdaıda, adamdar salqyndaý úshin kondıtsıoner ornatady. Ystyqtap kelip, salqyn ǵımaratta salqyndaǵan adam qaıtadan ystyqqa shyqqanda, adam aǵzasynda temperatýra aýytqıdy. Bul ımmýnıtettiń álsireýine ákelýi múmkin», - dedi A.Malbasqanov.
Onyń aıtýynsha, adam túrli ınfektsııany juqtyrmaý úshin kondıtsıoner fıltrin ýaqytynda aýystyryp turýy tıis. Bólme tabıǵı jolmen jeldetilip tursa – eń abzaly bolmaq.
«Kondıtsıoner qosqanda biz esike terezeni jaýyp júremiz. Apparat bir bólmedegi aýany ǵana almastyrady. Sondyqtan, kondıtsıoneri bar bólmede de vırýs juqtyrý yqtımaldyǵy joǵary. Ásirese fıltri aýyspaǵan jaǵdaıda. Sebebi, eski fıltr klebsıella, legıonella bakterııalaryn taratýy múmkin. Olar las jerde ósetin mıkroorganızmder. Bul bakterııalar da pnevmonııaǵa ákeledi», - dedi ol.
