Kontsertin ótkizýge Pragaǵa ushyp kelgen Dımash kóliktiń ústinde otyryp qoltańba taratty

PRAGA. QazAqparat - Keshe Pragadaǵy «Tıpsport» arenasynyń janyna jınalǵan adam qarasy kóp boldy. Álemniń 15-ten astam elinen kelgen Dears-ti Cheh Respýblıkasynda ártistiń alǵashqy jeke kontsertin ótkizýge kelgen Dımash pen onyń komandasy qarsy aldy, dep habarlaıdy QazAqparat.

Dimashnews saıtynyń málimetinshe, Dımash Qudaıbergenniń jeke kontserti ótetin arenanyń «Tıpsport» aýmaǵyn keshe jyly jáne merekelik atmosfera jaılaǵan.

Chehııa, Fınlıandııa, Brazılııa, Reseı, Rýmynııa, Ýkraına, Germanııa, Bolgarııa, Kanada, Ulybrıtanııa, Ispanııa, Perý, Polsha, Qazaqstan jáne basqa da elderdiń ókilderi Dımashty Cheh Respýblıkasynyń júregi – Pragada úlken qýanyshpen qarsy aldy.

Dástúr boıynsha, Dears súıikti ánshiniń ánderin birlesip oryndady.

Dımashtyń chehııalyq jankúıerleri qymbatty qonaqtardyń kezdesýin uıymdastyrdy.

Ulttyq cheh kostıýmindegi Dear qolynan dástúrli nan-tuzdy ánshiniń ózi jáne onyń ata-anasy aldy.

Sondaı-aq, ánshige jergilikti sheberlerdiń ulttyq cheh stılinde qoldan jasalǵan ádemi syılyqtary tapsyryldy.

Kútip alýshylar óte kóp bolǵandyqtan Dımashqa avtomobıldiń shatyryna shyǵyp otyryp qoltańba taratýǵa týra keldi, jankúıerlerimen sóılesip, olarǵa alǵysyn aıtty.