Qonaqjaı otbasy: ShQO-da aýylda úsh apta turyp qazaq tilin úırenýge 47 bala ótinim berdi

ÓSKEMEN. QazAqparat – Shyǵys Qazaqstan oblysynda «Qonaqjaı otbasy» jobasy aıasynda qazaq tilin úırený úshin aýylda turýǵa 50-ge jýyq bala ótinim berdi, dep habarlaıdy QazAqparat tilshisi.

ShQO bilim basqarmasy baspasóz qyzmetiniń málimetine súıensek, bıyl óńirde alǵash ret qolǵa alynyp otyrǵan memlekettik tildi oqytý maqsatyndaǵy «Qonaqjaı otbasy» jobasyna ótinim qabyldaý jalǵasyp jatyr.

«Búgingi tańda jobaǵa qatysýǵa 47 balanyń ata-anasy ótinish bildirgen. Ótinishter Glýbokoe, Altaı aýdandary, Rıdder, Shemonaıha jáne Óskemen qalalarynan tústi. Jospar boıynsha oqýshylar aýyldarǵa 10 maýsymda kelip, 30 maýsymǵa deıin bolady», - delingen aqparatta.

Aýyldarda arnaıy shtab jumys isteıdi. Onyń quramyna polıtseıler, psıhologtar men muǵalimder kiredi.

Al ata-analar úshin WhatsApp jelisinde top qurylyp, kúnine eki ret esep jiberiledi.

Aıta keteıik, jobaǵa qatysýǵa nıet bildirgender ótinishti 25 mamyrǵa deıin jibere alady.

Berel, Órel jáne Katonqaraǵaı aýyldaryndaǵy 32 otbasy balalardy qabyldaýǵa daıyn.

Eske salsaq, osyǵan deıin ShQO-da qala balalary aýylda bir otbasynyń úıinde 20 kún turyp, qazaq tilin úırenetinin habarlaǵan edik.