Qonaqtar jappaı ýlanyp qalǵan pavlodarlyq meıramhana ıesine aıyppul salyndy

PAVLODAR. KAZINFORM -Pavlodar qalalyq ákimshilik sotynyń qaýlysymen sanıtarlyq talaptardy saqtamaǵan meıramhanaǵa 275 myń teńge aıyppul taǵaıyndaldy.

Pavlodar qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty sanıtarlyq talaptardy óreskel buzý deregi boıynsha ákimshilik isti qarady.

Sotta aıtylǵandaı, bıylǵy 8 maýsymda Pavlodar qalalyq sanıtarlyq-epıdemıologııalyq baqylaý basqarmasyna jedel járdem stantsııasynan «B» meıramhanasynda bolǵan azamattarda jedel bakterııalyq ishek ınfektsııasy (JIA) jaǵdaılary tirkelgeni týraly habarlama kelip túsken.

- Sol kúni epıdemıologııalyq tekserý bastalyp, zerthanalyq synamalar alyndy. Tekserý barysynda meıramhananyń tıisti ruqsattarsyz jumys istegeni anyqtaldy. 9 maýsymda qyzmetke tyıym salý týraly qaýly berilgenine qaramastan, meıramhana jumysyn jalǵastyrdy. Sonyń saldarynan tamaqtan ýlaný faktileri qaıta tirkeldi. Tek 9 maýsym kúni BKI dıagnozymen 18 shuǵyl habarlama tirkeldi,-delingen aıyptaý dereginde.

Sot otyrysynda jeke kásipker óz kinásin tolyq moıyndap, quqyqbuzýshylyqtyń alǵash ret jáne abaısyzdyqtan jasalǵanyn túsindirip, sottan jaýaptylyqty jeńildetetin mán-jaı retinde eskerýdi surady.

Sot QR Ákimshilik quqyqbuzýshylyq týraly kodekstiń 462-baby 3-bóligin basshylyqqa alyp, jeke kásipker J.-ny kináli dep tanydy. Oǵan ákimshilik jaza retinde 275 240 teńge aıyppul jáne «B» meıramhanasynyń qyzmetin bir aı merzimge toqtatý jazasyn taǵaıyndady.

Qaýly zańdy kúshine engen joq.

Eske sala keteıik, Pavlodarda qyz uzatý toıynan keıin 33 adam ýlanǵan.

Keıin jurt jappaı ýlanǵan meıramhana ruqsatsyz jumys istegeni belgili boldy.