Qonaqúılerge «juldyz» berý júıesi jańartylady
ASTANA. KAZINFORM – Vedomstvo ázirlegen túzetýler paketine ornalastyrý oryndaryn sanattaý júıesin jańǵyrtý da engizilgen. Qazirgi ýaqytta bul túzetýler Májiliste qaralyp jatyr.
Týrızm jáne sport mınıstrliginiń málimetinshe 2008 jyly bekitilgen qoldanystaǵy sanat berý erejeleri qazirgi zaman talaptary men halyqaralyq standarttarǵa sáıkes kelmeıdi jáne jańǵyrtýdy qajet etedi. Jańartylǵan júıe qyzmet sapasyn jaqsartýǵa, baǵalaý rásimderiniń ashyqtyǵyn qamtamasyz etýge jáne qonaqúı ındýstrııasynyń básekege qabilettiligin arttyrýǵa baǵyttalǵan.
Ulttyq statıstıka bıýrosynyń málimetine sáıkes, 2025 jylǵy qyrkúıekte Qazaqstanda 4 442 ornalastyrý nysany tirkelgen. Alaıda olardyń tek 112-si ǵana resmı túrde «juldyz» sanatyna ıe. Mundaı tómen kórsetkish apellıatsııa mehanızminiń bolmaýymen, baǵalaý rásimderin júıeli túrde qaıta qaraý tájirıbesiniń joqtyǵymen jáne talaptardyń oryndalýyna baqylaýdyń álsizdigimen baılanysty. Sonymen birge juldyzdy sanatty ózdiginen ıelený tájirıbesi tutynýshylardy jańylystyryp, salaǵa degen senimdi tómendetedi.
Jańartylǵan sanattaý jobasynda Hotelstars Union halyqaralyq qaǵıdattaryna beıimdelgen naqty baǵalaý ólshemderi engizilgen. Sondaı-aq Týrızm jáne sport mınıstrliginiń ókilettigin keńeıtý, ınspektorlardy oqytý jáne mamandar daıarlaý qarastyrylǵan.
🔹Jańa júıeni engizý nátıjesinde:
* Qonaqúı qyzmetteriniń sapasy artady;
* kelýshilerdiń qanaǵattaný deńgeıi joǵarylaıdy;
* Qazaqstannyń týrıstik baǵyt retindegi tartymdylyǵy kúsheıedi;
* ornalastyrý nysandarynyń resmı sanatqa qatysý úlesi ulǵaıady.
Halyqaralyq tájirıbe mundaı tásilderdiń tıimdiligin kórsetip otyr. Máselen, Germanııa, Aýstrııa, Gretsııa, Jańa Zelandııa jáne ózge elderde ornalastyrý oryndaryna sanat berý salalyq nemese ulttyq týrıstik uıymdar arqyly júrgiziledi. Bul baǵalaý rásimderiniń ashyqtyǵy men birizdiligin qamtamasyz etedi.
Aıta keteıik, qazirgi ýaqytta Qazaqstanda týrıstik ınfraqurylymdy damytý jáne qyzmet sapasyn jaqsartýǵa baǵyttalǵan birqatar memlekettik qoldaý sharalary júzege asyrylýda.
Olardyń qatarynda taý shańǵysy kýrorttaryna arnalǵan tehnıka men jabdyqty satyp alýǵa jumsalǵan shyǵyndardyń bir bóligin óteý, jol boıyndaǵy qyzmet kórsetý nysandaryn salýdy qoldaý, týrıstik qyzmet kórsetýge arnalǵan avtokólik satyp alýdy sýbsıdııalaý, týroperatorlardyń shyǵyndaryn jáne áýe bıletteriniń qunyn sýbsıdııalaý, sondaı-aq sanıtarlyq-gıgıenalyq toraptardy kútip-ustaýǵa arnalǵan qarajat qarastyrylǵan.
Bul qoldaý quraldary ishki týrıstik aǵynnyń ósýine, týrıstik ónimderdiń damýyna jáne kórsetiletin qyzmet sapasynyń artýyna yqpal etedi.
Aıta ketelik elde halyqaralyq deńgeıdegi 24 qonaqúı salynady.