Qonaq úıge jarylǵysh zat qoıyldy dep habarlaǵan azamatsha quryqtaldy
ASTANA. 22 qyrkúıek. QazAqparat - Almaty qalasy Almaly aýdanyndaǵy Tóle bı kóshesi boıynda oranalasqan qonaq úılerdiń birine jarylǵysh zat qoıylǵany týraly aqparat barlyq jedel kómek kórsetý qyzmetin eleń etkizdi.
Bul týraly Almaty qalalyq ІІD baspasóz qyzmeti habarlady.
«Keshkilik 21 saǵat 27 mınýtta Almaty qalasy ІІD Jedel basqarý ortalyǵynyń jelisinde kezekshilikte otyrǵan polıtsııa serjanty Gúlsim Shyńǵysovaǵa belgisiz bir áıel adam qońyraý shalyp, qonaq úıge jarylǵysh zat qoıylǵandyǵy týraly aqparat beredi. Mundaı jaǵdaıda oqıǵanyń jelisi jaıynda tolyq málimet alyp qana qoımaı, qońyraý shalýshynyń turǵan jerin tez arada anyqtaý shapshańdyqty qajet etedi. Alaıda Jedel basqarý ortalyǵynyń bilikti qyzmetkerleri arqasynda aınalasy birer mınýt ishinde qońyraý shalýshynyń meken-jaıy anyqtalyp polıtsııa narıady jóneltildi. Bizdiń operatorymyz aqparat berýshi belgisiz áıelmen tildesip jatqanda «Boran-004» ekıpajy qońyraý kelip túsken Tóle bı men Mırzoıan kósheleriniń qıylysyna kelip jetken bolatyn» - dep málimdedi Almaty qalasy ІІD Jedel basqarý ortalyǵynyń bastyǵy polıtsııa polkovnıgi Andreı Kvashnın.
Joǵaryda atalǵan meken-jaıǵa tártip saqshylary nebári eki jarym mınýt ishinde kelip jetken. Al bul ýaqyt ishinde Almaty oblysy Іle aýdany Boraldaı kentiniń 33 jastaǵy turǵyny qylmys ornynan tez arada ketpek nıette taksı kútip turǵan jerinde qolǵa túsedi.
«Quryqtalǵan áıel jasaǵan qylmysyn tolyǵymen moıyndady. Ony ІІD-niń barlyq maǵlumattar bazasymen tekserdik. Ol osydan alty jyl buryn birneshe ret buzaqylyq qylyqtar jasaǵany úshin, jáne jarylǵysh zat qoıylǵany jóninde jalǵan aqparat bergendigi úshin jazasyn ótep kelgen eken. Sondaı-aq tergeý amaldary barysynda ol psıhonevrologııalyq dıspanserge tekserýge jiberiledi. Aıta ketý kerek qalamyzdaǵy jedel áreket etý qurylymdaryn jalǵan aqparat berip, dúrliktirý memleket qarjysyna úlken zııan keltiredi», - dep túıindedi óz sózin A.Kvashnın.
Málimetter úshin: tótenshe qyzmettermen 40 bólmeli bes qabatty qonaq úıdi tııanaqty tekserýdi 21 saǵat 42 mınýttan 22 saǵat 33 mınýtqa deıin júrgizdi. Qaýipsiz orynǵa 60 adam jetkizilse, onyń 45-i qonaqtar, ózgeleri qyzmetkerler bolǵan. Qoǵamdyq tártipti qamtamasyz etýdi 30 polıtsııa qyzmetkeri men 15 patrýldik avtokólik atqarǵan. Jarylǵysh zat tabylmady.
