Qonaq úıdi jezóksheler ordasyna aınaldyrǵan áıelge qylmystyq top qurdy degen aıyp taǵyldy
ALMATY. 21 qyrkúıek. QazAqparat /Erbol Azanbek/ - Almatyda qonaq úıdi jezóksheler ordasyna aınaldyrǵan onyń ıesine qylmystyq top qurdy degen aıyp taǵyldy, dep habarlaıdy qalalyq ІІD-niń baspasóz qyzmeti.
Osydan bir aı buryn polıtsııa qyzmetkerleri Áýezov aýdanyndaǵy qonaq úılerdiń birinde jezóksheler ordasyn anyqtaǵan bolatyn. Qylmystyq bızneske 50 jastaǵy Larısa basshylyq etken. «Qylmystyq isti qozǵaýǵa L.esimdi azamatshanyń ózi, qonaq úı qyzmetkerlerimen jasalǵan 10 qylmystyq is túrtki boldy. Negizinen - jeńgetaılyq, adamdy jezókshelikke jegý, adam erkin zańsyz shekteý syndy jeke tulǵa men qoǵamǵa qaýipti qylmystar. Tergeý barysynda qonaq úı basshysy qylmystyq isten paıda tapqanyn moıyndap otyr», - deıdi qalalyq ІІD-niń uıymdasqan qylmyspen kúres basqarmasy, adam saýdasymen kúres bóliminiń bastyǵy Tanat Nazanov.
Polıtsııa qyzmetkeriniń málimetinshe Larısanyń bıznesin «órkendetýge» tórt ákimger kómektesken. Eń úlkeni 61-de, eń jasy 29-da. Olardyń kinási tergeý kezinde dáleldenbek. «Bul qonaq úı ózin tek jezóksheler úıi retinde kórsetti. Barlyq nómirleri jezókshelerdiń qyzmetine arnalǵan. Aýysymmen qyzmet istegen ákimshilerdiń mindetine jezókshelerdi baqylaý da kirgen. Jeńgetaılyqpen qatar olardyń quzyryna qarjylyq túsimderdi alý da kirgen», - deıdi T.Nazanov.
Atalǵan is boıynsha tergeý jalǵasýda. Shamamen eki aıdan soń qonaq úı qyzmetkerleri sot aldynda jaýap beredi.
