Qonaq úıdegi bala ólimi: Brıtan azamatyna qatysty sot otyrysy ótti
ALMATY. QazAqparat – Búgin Almatyda InterContinental qonaq úıinde kóz jumǵan bir jarym jasar balanyń ólimi boıynsha sot otyrysy ótti. Sot aldynda qyzdyń ákesi, brıtan azamaty Barakat Mohammed jaýap berip jatyr, dep habarlaıdy QazAqparat tilshisi.
Onlaın rejımdegi sot otyrysynda sottalýshynyń úsh advokaty 3 túrli ótinish bildirdi.
Biri – is boıynsha keltirilgen dálel-aıǵaqtardy qaıta qaraý, psıhıatr mamannyń qorytyndysyn iske engizý, isti alqa bılerdiń qatysýymen qaraý týraly ótinish engizdi.
Qorǵaýshy Taır Nazhanov sotqa deıingi tergeý kezinde qylmystyq protsessýaldyq kodekstiń normalary órsekel buzylǵanyn alǵa tartty.
Onyń aıtýynsha, sottalýshyǵa kásibı zańdy kómek kórsetilgen joq. Bunyń barlyǵy ádil ári zańdy úkim shyǵarýǵa kedergi bolmaq.
Advokat 34 pýnkt boıynsha qylmystyq protsessýaldy kodeks buzylǵanyn atap ótip, barlyǵyn aldyn-ala sot otyrysynda qaraý kerektigin aıtty.
Atap aıtqanda, balanyń denesin qaraǵanda, Barakat Mohammedti ustaǵanda, qonaq úıdegi nómirdi qaraý kezinde zańbuzýshylyqtar bolǵan.
«Jábirlenýshige qatysty sot, medıtsınalyq, keshendi, psıhologo-psıhıatrııalyq saraptama taǵaıyndaýdy suraımyn. Sofııa Barakat qatysty (sottalýshynyń qyzy - avt) medıtsınalyq qujattardy qarap, qajet bolǵan jaǵdaıda eksgýmatsııa jasaýdy suraımyn. Óıtkeni mıyna jaraqat keltirýdiń mehanızmi zerttelmegen», - dedi T.Nazhanov.
Onyń aıtýynsha, Barakattyń qusyǵynan esirtki zaty tabylǵany týraly narkologtardyń qorytyndysy kúmán týdyrady.
Sot otyrysy kelesi aptada jalǵasatyn boldy.
Aıta ketý kerek, oqıǵa 2019 jyly 24 qazanda Almatydaǵy InterContinental qonaq úıinde 1,5 jastaǵy Sofııa Barakat esimdi qyz bala kóz jumǵan bolatyn.
Polıtsııa kúdikti retinde onyń ákesi Barakat Mohammedti ustady.
