Qonaq úı ıesinen aqsha suraǵan polıtsııa bastyǵy kinásin moıyndady
AQTÓBE. QazAqparat - Aqtóbe qalalyq sotynda Elek polıtsııa bóliminiń burynǵy bastyǵy Nábı Aldamjarovqa qatysty qylmystyq is qaraldy. Burynǵy polıtsııa qyzmetkeri taǵylǵan aıyppen kelisip, protsesýaldy kelisim surady, dep habarlaıdy QazAqparat tilshisi.
Nábı Aldamjarov 2016 jyly Elek polıtsııa bóliminiń bastyǵy qyzmetine taǵaıyndalǵan. Aıyptalýshy 2018 jyldyń sáýir aıynda «OK» qonaq úı keshenine baryp, ıesimen kezdesedi. Aıyptaý qorytyndysyna súıensek, N. Aldamjarov qonaq úı bıznesine qoldaý kórsetý úshin 100 myń teńge suraǵan.
«Jábirlenýshi Aıtolqyn Ájimovadan 100 myń teńge surady. Aqshany alýǵa kelesi kúni tańerteń keletinin eskertti. Sodan keıin jábirlenýshi Ájimova bul qylmystyq is ekenin bilip, polıtsııa departamentiniń ishki qaýipsizdik basqarmasyna habar berdi. Kelisim boıynsha 20 myń teńge alyp, oqıǵa ornynda ustaldy. Qylmystyq kodekstiń «Alaıaqtyq» baby boıynsha is qozǵaldy», - dedi memlekettik aıyptaýshy.
Aıta keteıik, jábirlenýshi keshirim berip, protsesýaldyq kelisim jasaldy. Prokýror sottalýshyny aıypty dep tanyp, ómir boıy memlekettik, quqyq qorǵaý salasynda jumys isteý quqyǵynan aıyryp, 20 AEK kóleminde aıyppul salýdy surady. ıAǵnı, 200 myń teńgeden astam aıyppul tóleýi múmkin.
