Qonaevty eske alý týrnırine qatysý úshin Tarazǵa 12 eldiń balýany keldi
TARAZ. QazAqparat - Tarazda memleket jáne qoǵam qaıratkeri Dinmuhamed Qonaevty eske alýǵa arnalǵan eresekter arasyndaǵy erkin kúres boıynsha halyqaralyq týrnır ótedi, dep habarlaıdy «QazAqparat» HAA tilshisi Jambyl oblystyq ishki saıasat basqarmasyna silteme jasap.
Ashylý rásimi «Taraz-Arena» sport saraıynda ótedi.
2007 jyldan beri týrnır respýblıkalyq deńgeıde, al 2012 jyldan bastap halyqaralyq deńgeıde ótip jatyr. Byltyrǵy saıysqa Reseı, Mońǵolııa, Brazılııa, Armenııa, Grýzııa, Tájikstan, Qyrǵyzstan, Ózbekstan elderinen kelgen 150-den astam sportshy qatysqan edi. Bıyl olardyń qataryna Japonııa, Polsha, Ýkraına, Belarýs, Ázerbaıjan kirdi.
Uıymdastyrýshylardyń aıtýynsha, atalmysh jarystyń maqsaty - Qazaqstannyń erkin kúresin damytý, jastardyń patrıottyq sezimin oıatý, QR Prezıdentiniń jyl saıynǵy Qazaqstan halqyna arnaǵan Joldaýyndaǵy tapsyrmalardy oryndaý.
Qatysýshylar 57, 61, 65, 70, 74, 86, 97 jáne 125 keli salmaq dárejelerinde synǵa túsedi. Halyqaralyq jarysty uıymdastyrýǵa Qazaqstan Respýblıkasy Grek-rım, erkin jáne áıelder kúres federatsııasy, Jambyl oblysy ákimdiginiń dene shynyqtyrý jáne sport basqarmasy, Jambyl oblysynyń grek-rım, erkin jáne áıelder kúres federatsııasy atsalysty.
Birinshi oryndy ıemdengen sportshy 5 myń dollar alady. Ár salmaq dárejesi boıynsha birinshi oryn alǵan sportshy-jeńimpazdardyń jattyqtyrýshylaryna bir myń dollar kóleminde qarjylaı syıaqy beriledi.
Aıta keteıik, Dinmuhamed Qonaev - asa kórnekti memleket jáne qoǵam qaıratkeri, úsh márte Sotsıalıstik Eńbek Eri, Qazaq KSR Ǵylym akademııasynyń akademıgi, tehnıka ǵylymdarynyń doktory. 26 jyl boıy Qazaqstan Kompartııasy Ortalyq Komıtetiniń Birinshi hatshysy qyzmetin atqardy. D. Qonaev óz zamanynyń uly saıasatkeri bola bildi. Ol bılik basynda bolǵan kúrdeli ári qarama-qaıshylyqqa toly ýaqyt bolǵanymen, eldiń ekonomıkasyn, áleýmettik salasyn, ǵylymyn, ulttyq mádenıetin damytý isine aıtýly eńbek sińirdi. Búginde onyń aty kóptegen kóshelerge, shaǵyn aýdandarǵa, ýnıversıtetterge, murajaılarǵa berilgen. Jyl saıyn Qonaevty eske alýǵa arnalǵan túrli sharalar ótkizilip turady.
