Qonaevtaǵy áýe sharlar festıvali kimniń esebinen uıymdastyrylady
Buǵan deıin Almaty oblysynyń ákimdigi bul jobany memlekettik bıýdjetten 183 mln teńgege qarjylandyrýdy josparlaǵan edi.
«Alaıda, demeýshiler tartý jumystary oń nátıje berip, «Myń boıaýly aspan» halyqaralyq shar festıvali kommertsııalyq joba retinde, jergilikti demeýshiler men kásipkerlik qurylymdarmen kelisim jasaý arqyly ótkiziletin bolyp qaıta maquldandy. Osylaısha, festıvaldi uıymdastyrýǵa memlekettik bıýdjetten qarjy jumsalmaıdy»,- dep habarlady Almaty oblysy ákimdiginiń baspasóz qyzmetinen.
Óńir ákimdigi oqıǵaly týrızm – álemde keń tanymaldyqqa ıe bolǵan jáne Qazaqstanda damý satysynda turǵan týrıstik qyzmettiń perspektıvalyq baǵyty ekenin atap ótti.
«Ol basqa týrıstik qyzmet túrleriniń ishinde ınteraktıvtiligimen, ıaǵnı is-sharaǵa adamdardyń kóp bóligin tartýymen, emotsıonaldylyǵymen jáne taqyryptyq ártúrliligimen erekshelenedi. Óıtkeni Almaty oblysy ishki jáne keletin týrıster sany boıynsha respýblıkada aldyńǵy qatarda. «Myń boıaýly aspan» - bul azamattardyń birligi men otbasylyq qundylyqtardy birinshi orynǵa qoıatyn festıval. Festıvalda aspanǵa alyp sharlar men batpyraýyqtardy ushyrý josparlanǵan. Oǵan álemniń túrli elderinen ókilder qatysady»,- dep túsindirdi ákimdikten.
Festıval aıasynda sharlarmen ushýdan basqa, batpyraýyq saıysy, balalar men eresekterge arnalǵan ınteraktıvti is-sharalar, jarqyn ınternet-kontentke arnalǵan fotoaımaqtar, mýzykalyq jáne teatrlyq shoýlar, túngi jaryq qoıylymdary uıymdastyrylady.
«Festıval Qonaev qalasynyń iri is-sharalar men otbasylyq merekelerdi ótkizý orny retinde oń ımıdjin qalyptastyrady jáne Almaty oblysynda «oqıǵaly týrızmdi» ilgeriletýdiń mańyzdy quramdas bóligi retinde aıqyndalady. Onyń negizgi maqsaty – oblystyń, osy aımaqtyń jáne memleketimizdiń týrızmi men ekonomıkasyn damytýǵa járdemdesý»,- dep atap ótti Almaty oblysynyń ákimdiginen.
