Qonaevtaǵy jelkendi sport ortalyǵy ákimdik qaramaǵyna ótti
QONAEV. KAZINFORM — Jelkendi sport oqý-jattyǵý ortalyǵy Qonaev ákimdiginiń kommýnaldyq menshigine qabyldandy. Buǵan deıin nysan «Qonaev» ÁKK» AQ-nyń qaramaǵynda bolǵan.
Qonaev ákimdiginiń qaýlysyna sáıkes, jelkendi sporttyń oqý-jattyǵý ortalyǵy qalanyń kommýnaldyq menshigine memlekettik aktıvter jáne satyp alý bóliminiń teńgerimine óteýsiz qabyldap alyndy. Teńgerimdik quny — 31 649000 teńge. Nysan Qapshaǵaı sý qoımasynyń ońtústik-batys jaǵalaýynda ornalasqan. Aýmaǵy — 2 gektar, nysannyń aýdany — 380 sharshy metr.
— Búginde Qonaevta jelkendi qaıyq sport túrin damytý kózdelip otyr. Osy maqsatta eki jol qarastyrylady, biri — bıýdjet esebinen nysandy jańǵyrtý bolsa, ekinshisi — ınvestorlardy tartý arqyly ortalyqtyń jumysyn jandandyryp, ǵımaratty jańalaý. Qazirgi tańda ınvestorlardan bes túrli joba túsip, qarastyrylyp jatyr, — delingen ákimdiktiń taratqan habarlamasynda.
Qala basshysy osy túıtkildi baqylaýǵa alýdy ákim apparatyna tapsyrdy.
Eske salaıyq, buǵan deıin Pavlodar tramvaı parki nelikten oblystyń kommýnaldyq menshigine ótkeni jaıly jazǵan edik.