Qonaevtaǵy jaǵajaılarda tazalyq qalaı qamtamasyz etiledi?

QONAEV. KAZINFORM – Qonaev qalasy ákimdiginiń málimetinshe, №6 jaǵajaıda 40 kásipkerlik nysan jumys isteıdi. Olardyń barlyǵy senimgerlik basqarýshy kompanııamen kelisimshart jasap, jalǵa alǵan aýmaqty kútip ustaýǵa mindettelgen. 

Kásipkerler kún saıyn tazalyq júrgizýge, sákilerdi dezınfektsııalaýǵa, qoqys jáshikteri men jaryq ornatýǵa, sondaı-aq qaýipsizdikti qamtamasyz etýge jaýapty.

«№6 jaǵajaıda 45 qoqys jáshigi, 10 konteıner jáne úsh ájethana ornatylǵan. Mundaǵy tazalyqqa 30 jumysshy men 2 arnaıy tehnıka jumyldyrylǵan. Qaýipsizdikti 10-nan astam qutqarýshy qamtamasyz etedi, medıtsına qyzmetkerleri kezekshilik atqarady, beınebaqylaý kameralary ornatylǵan. Monıtorıng kún saıyn júrgiziledi», – dep málimdedi Qonaev qalalyq TÚKSh bólimi.

№5 jaǵajaıda 28 bólmeli 6 ájethana, 5 jýyný orny, 6 kıim aýystyratyn bólme, 30 qoqys jáshigi, 40 bóshke jáne 25 konteıner qoıylǵan. Munda jasandy ıntellektpen jabdyqtalǵan beınebaqylaý júıesi jumys isteıdi.

Tártip pen qaýipsizdikti qamtamasyz etý úshin TJB jáne polıtsııa qyzmetkerleri jaǵajaı aýmaǵynda turaqty túrde kezekshilik atqarýda.

Ákimdiktiń málimetinshe, kún saıyn №6 jaǵajaıǵa 4-5 myń, al №5 jaǵajaıǵa 1 500-2 000 adam keledi. Demalys kúnderi bul kórsetkish birneshe esege deıin artady.

Almatylyq turǵyn Murat Amangeldıevtiń aıtýynsha, №5 jaǵajaıda demalýshylarǵa barlyq jaǵdaı jasalǵan.

«Ár demalys saıyn otbasymyzben kelemiz. Munda taza, qaýipsiz. Qutqarýshylar, medqyzmetkerler, kıim aýystyratyn bólmeler bar. Balalarǵa oınaıtyn alań bolsa deımiz. Eń bastysy – tazalyq. Qoqysty arnaıy jáshikterge tastaý – mádenıettiliktiń belgisi», – dedi ol.

Sanıtarııalyq-epıdemıologııalyq baqylaý basqarmasynyń basshysy Narıman Orynbasarulynyń aıtýynsha, Qapshaǵaı sý qoımasynan aı saıyn sý synamasy alynyp, zerthanalyq saraptamalar júrgiziledi. Qorytyndysy – qanaǵattanarlyq, sý sanıtarlyq talaptarǵa saı keledi jáne shomylýǵa ruqsat berilgen.

Jaǵajaı maýsymy bastalǵaly qoǵamdyq oryndardy lastaǵany úshin QR ÁQBtK 434-2-baby boıynsha 35 ákimshilik hattama toltyrylyp, jalpy somasy 1 376 200 teńge aıyppul salynǵan.

Qala ákimdigi jaǵajaılardaǵy sanıtarlyq talaptardyń saqtalýyna baqylaýdyń kúsheıgenin atap ótti. Kásipkerler kelisimshart talaptaryn oryndamaǵan jaǵdaıda jaýapkershilikke tartylady. Sondaı-aq ákimdik demalýshylarǵa tazalyq pen tártipti saqtaý – ortaq mindet ekenin eske saldy.

Aıta keteıik, Qonaevta jańa kazınolar ashylýy múmkin.