Qonaevtaǵy saıajaılardyń ornyna kópqabatty ǵımarattar salynady
Oblys ortalyǵynyń Bas josparyna sáıkes, 6 myń adam turatyn toǵyz saıajaı alqaby qala shekarasyna engizildi. Olardyń ornyna kópqabatty ǵımarattar salynady. Bul týraly óńir basshysy qala turǵyndarymen kezdesýi barysynda málim etti, dep habarlaıdy Kazinform.
Almaty oblysynyń ákimi Marat Sultanǵazıevtiń sózinshe, josparǵa saı, shahardyń aýmaǵy 19 myń gektardy qamtıdy. Halyq sany 2050 jylǵa qaraı 200 myńǵa jetedi.
«Jaqynda jańa ákimshilik-turǵyn úı ortalyǵyn salýdy kózdeıtin qalany damytýdyń keshendi jospary qabyldanady. Soǵan sáıkes, 6 myń adam turatyn 9 saıajaı alqaby qala shekarasyna engizildi. Olardyń ornyna kópqabatty ǵımarattar salynady», - dedi Marat Sultanǵazıev.
Aımaq basshysy oblysta qurylys nysandaryn salýǵa talap kúsheıtilgenin atap ótti.
«Mysaly, Qonaevta salynyp jatqan 10 kópqabatty úıdiń jeteýiniń jobasy tolyqtyrýǵa jiberilgen. Olarǵa qasbetine, abattandyrýǵa, avtoturaqqa baılanysty eskertý berildi», - dedi ol.
