Qonaevtaǵy demalys ornyndaryna ortaq dızaın-kod jasalady
QONAEV. KAZINFORM — Qonaev qalasynyń jańarǵan jaǵajaıyna kúnine 2 myń adam keledi.
Qonaev qalasynyń ákimi Ashat Berdihanovtyń aıtýynsha, qalaǵa qaraıtyn 8 jaǵajaı bar. Byltyr № 5 jaǵajaı bıýdjet esebinen, al bıyl onyń tóńiregindegi 1 shaqyrym jaǵajaı ınvestor esebinen abattandyrylyp, qoldanysqa berilgen.
— Jaǵajaıdyń jańa keıipke enýi týrıstik tartymdylyqty arttyrdy. Mysaly, byltyr qalamyzǵa 1,5 mln demalýshy kelse, bıyl olardyń sany shomylý maýsymy aıaqtalmaı-aq 860 myńnan asyp ketti. Orta eseppen alǵanda № 5 jaǵajaıǵa kúndelikti 1500-2000, demalys kúnderi 4500-6000 adam keledi. Bul óte jaqsy kórsetkish, — dedi ákim.
Sonymen qatar ol qalǵan 7 jaǵajaı № 5 jaǵalaýǵa uqsas kórkeıtiletinin aıtty. Atap aıtqanda, jobada ınfraqurylym, sanıtarlyq aımaqtar, jasyl aımaqtar, shaǵyn sáýlettik nysandar, kompozıtsııalar, demalys oryndary men fýdkorttar, qaýipsizdik sharalary qarastyrylady.
— «Raýan» shaǵyn aýdanynan bastap «18» shaǵyn aýdanǵa deıingi aýmaqty qamtıtyn 6,1 shaqyrym jaǵalaý aımaǵy kezeń-kezeńimen jańǵyrtylady. Onyń ishinde № 5 jaǵalaý qoldanysta bolsa, qalǵanynyń jobalyq qujattary daıyndalyp jatyr. Bıyl shomylý maýsymy aıaqtalǵan soń № 6 jáne № 7 jaǵajaıda qurylys jumystary bastalady dep josparlanǵan. Al № 8 jaǵajaı ınvestor esebinen abattandyrylady, — dedi Ashat Berdihanov.
Qonaevta kommýnaldyq jaǵajaılardan bólek, 140 demalys orny bar. Qala ákimi olardy da bir rettilikke, qalypqa keltirý úshin dızaın-kod jasalyp, usynys beriletinin atap ótti. Sonymen qatar týrızmdi damytý maqsatynda birqatar ınvestıtsııalyq jobalar júzege aspaq.
— 2025-2028 jyldar aralyǵynda jalpy somasy 306,4 mlrd teńge bolatyn 11 ınvestjoba júzege asady dep josparlanyp otyr. Onyń qatarynda qonaqúıler, basseınder, golf-klýb, saýda úıleri jáne basqa da nysandar bar. Ákimdik tarapynan qajetti memlekettik qoldaýlar kórsetilip jatyr, — dedi ol.
Eske salaıyq, buǵan deıin Qonaevta jańa kazınolar ashylýy múmkin ekenin jazǵanbyz.