Qonaevtaǵy aýtıst balalarǵa arnalǵan ortalyq qalaı jumys istep tur
QONAEV. KAZINFORM – Qonaev qalasynda aýtıst balalarǵa arnalǵan jalǵyz ortalyq jumys isteıdi.
Qala ákimdiginiń málimetinshe, shahardaǵy bul ortalyqty jeke bastama retinde turǵyn Aıjan Abraımova ashqan. Ol erekshe bala tárbıelep otyrǵan ana.
- Qonaevta aýtıst dıagnozy qoıylǵan búldirshinder óte kóp. Sondyqtan olarǵa kómek berý úshin túzetý-damytý ortalyǵyn ashýdy jón kórdim. Aldymen aqsha jınap, 3 bólmeli páter satyp aldym. Keıinnen Mansap ortalyǵy usynǵan memlekettik granttyń konkýrsyna qatysyp, kómek aldym. Sóıtip, ortalyqtyń irgesin qaladym, – dedi ol.
Aýtızm spektri jáne sóıleý qabileti buzylǵan balalarǵa arnalǵan túzetý ortalyǵynda emdik massaj, jattyǵý, neıropsıhologtyń kómegi, logopedpen jumys jasaý sekildi qyzmetter kórsetiledi. Qazir ortalyqqa 12 bala tegin, 17 bala aqyly túrde keledi. Sonymen qatar munda áleýmettik osal toptan shyqqan 4 ana, 2 múgedektigi bar adam jumyspen qamtylǵan.
- Keı balalar, tipti, kámpıtti óz betinshe jeı almaıtyn. Qazir olar birtindep is-áreketke jarap qaldy. Al bir anamyz óz balasynyń 7 jasta sóılegenin alǵash ret estidi. Ońaltý, emdik sharalardan keıin bir balamyzdyń densaýlyǵy jaqsaryp, balabaqshaǵa baratyn qurdastarynyń qataryna qosyldy. Balalarymyzdyń ómiriniń ózgerýine yqpal etip jatqanymyzǵa óte qýanyshtymyn, – dedi Aıjan Abraımova.
Eske salaıyq, buǵan deıin Qonaevtaǵy Otbasyny qoldaý ortalyǵyna 1,5 myń otbasy tirkelgenin jazǵanbyz.