Qonaevtaǵy atys pen kisi óltirý isi boıynsha sot úkimi shyqty
QONAEV. KAZINFORM – Qonaevtaǵy kisi óltirý isi boıynsha alty aıyptalýshy 17 jyldan 19 jylǵa deıin bas bostandyǵynan aıyryldy.
Almaty oblysynyń qylmystyq ister jónindegi mamandandyrylǵan aýdanaralyq soty 6 sottalýshyǵa qatysty qasaqana adam óltirý jáne adam óltirýge oqtalý (QK-niń 99-baby 2-bóligi 7), 9) tarmaqshalary jáne 24-bap 3-bóligi, 99-bap 2-bóligi 1), 7), 9) tarmaqshalary) boıynsha qylmystyq isti qarady.
Sotpen anyqtalǵany, 2024 jyldyń maýsym aıynda Qonaev qalasyndaǵy «Aleks» demalys ornynda eki sottalýshy men jábirlenýshi «M» arasynda janjal týyndap, tóbeleske ulasqan. Jábirlenýshi basym túsip, osydan keıin sottalýshylarda ony óltirý nıeti paıda bolǵan. Olar qylmystyq oılaryn júzege asyrý úshin taǵy tórt adamdy tartqan.
Sol keshte Qonaev kóshesindegi HQKO mańynda olar jábirlenýshi «M»-ǵa birneshe ret oq atqan, keıin ol aýrýhanaǵa barar jolda kóz jumdy. Onyń dosy «B» jaraqat alyp, der kezinde kórsetilgen medıtsınalyq kómektiń arqasynda aman qaldy.
– Sot barlyq sottalýshyny QR QK-niń 99-baby 2-bóligi 1) 7), 9) tarmaqshalary, 24-baby 3-bóligi, 99-bap 2-bóligi 1), 7), 9) tarmaqshalary boıynsha kináli dep tanydy. Jaǵdaıdy jeńildetetin jáne aýyrlatatyn mán-jaılardy eskere otyryp, QK-niń 58-baby 4-bóligine sáıkes, «A» jáne «T» esimdi sottalýshylarǵa 19 jyl, al «A», «B», «A», «N» esimdi sottalýshylarǵa17 jyldan bas bostandyǵynan aıyrý jazasy taǵaıyndady, - dep habarlady Almaty oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Al sottalýshy «B» QK-niń 422-baby boıynsha kináli dep tanylyp, 2 jylǵa jáne 6 aıǵa bas bostandyǵyn shekteýge úkim shyǵaryldy.
Sot jazany taǵaıyndaý kezinde sottalýshylardyń buryn sotty bolmaǵanyn jáne kámeletke tolmaǵan balalary baryn jeńildetetin mán-jaı retinde, al atys qarýyn qoldanýyn aýyrlatatyn mán-jaı retinde eskerdi.
Eske salaıyq, byltyr jazda Qonaev qalasynda túngi ýaqytta qarýly qaqtyǵys bolyp, oqıǵa saldarynan zardap shekken 2000 jáne 2003 jylǵy jigitter aýrýhanaǵa jatqyzylyp, 2003 jylǵy azamat reanımatsııa bóliminde jan tapsyrǵan edi.